DÜNYA
Avropa Polis Agentliyi: 800-dən çox cinayətkar şəbəkə Avropa İttifaqını təhdid edir
![Avropa Polis Agentliyi: 800-dən çox cinayətkar şəbəkə Avropa İttifaqını təhdid edir](/files/2024/1/1200x630/17123524514818220995_1200x630.jpg)
Bakı, 6 aprel, AZƏRTAC
821 cinayətkar şəbəkə Avropa İttifaqının (Aİ) təhlükəsizliyini pozmaqla təhdid edir.
AZƏRTAC xəbər verir ki, bunu Avropa Polis Agentliyi (“Europol”) bildirib.
Haaqada təqdim olunan mütəşəkkil cinayətkarlıq haqqında hesabata əsasən, bir çoxu beynəlxalq səviyyədə fəaliyyət göstərən peşəkar dəstələrin 25 mindən çox üzvü var.
"Ciddi və mütəşəkkil cinayətkarlıq geniş yayılıb və Avropa İttifaqının daxili təhlükəsizliyi üçün əhəmiyyətli təhlükə yaratmağa davam edir", - deyə “Europol” bildirib. Təşkilat Aİ-nin 27 üzvü və “Europol”un 17 tərəfdaş ölkəsinin məlumatlarından istifadə edərək, problemin ilk koordinasiyalı araşdırmasının nəticələrinə əsasən bu qənaətə gəlib.
Sintetik narkotiklərin qanunsuz dövriyyəsi sahəsində ən təhlükəli cinayətkar şəbəkələrin fəaliyyət göstərdiyi ölkələr arasında Ermənistan da qeyd olunur.
Hesabata görə, şəbəkələrin böyük əksəriyyəti narkotik ticarəti ilə məşğuldur. Narkotik ticarəti ilə yanaşı, şəbəkələr adətən fırıldaqçılıqla da məşğul olurlar. Digər cinayətlərə oğurluq və insan alveri daxildir.
“Europol”un idarəedici direktoru Katrin de Bolle bildirib ki, heç bir üzv dövlət bundan sığortalanmayıb. Onun sözlərinə görə, 25 min şübhəli arasında 112 millətin nümayəndəsi var.
Ən böyük təhlükə cinayətlərin təşviqi, gizlədilməsi və gəlirin yuyulması məqsədilə leqal iş dünyasına daxil olmaqdan ibarətdir. Araşdırma göstərib ki, şəbəkələrin 86 faizi qanuni iş strukturlarından, böyük əksəriyyəti isə korrupsiya və zorakılıqdan istifadə edib.