Azərbaycan nümayəndə heyəti Ulyanovsk vilayətində görüşlər keçirmişdir
Moskva, 13 dekabr (AZƏRTAC). Ulyanovsk vilayətində 2014-cü il “Azərbaycan ili” elan ediləcəkdir. Bunu Ulyanovsk vilayətinin qubernatoru Sergey Morozov Azərbaycan diplomatları və Ümumrusiya Azərbaycan Konqresinin (ÜAK) rəhbərliyi ilə görüşdə bildirmişdir.
Azərbaycanın Rusiyadakı səfirliyinin əməkdaşları və ÜAK-ın üzvlərindən ibarət nümayəndə heyətinin Ulyanovska səfəri zamanı Ulyanovsk vilayəti ilə Azərbaycan arasında sosial-siyasi və iqtisadi- humanitar sahələrdə mühüm layihələrlə bağlı ilkin razılıq əldə edilmişdir. Səfər zamanı Azərbaycanın Rusiyadakı səfirinin müavini Qüdsi Osmanov, Azərbaycanın Rusiyadakı səfirliyinin diaspor məsələləri üzrə müşaviri Aqşin Əliyev, ÜAK-ın icraçı direktoru İlqar Hacıyev, ÜAK-ın Moskva vilayəti üzrə icraçı direktoru Araz Mürsəliyev, konqresin Ulyanovsk regional bölməsinin sədri İslam Hüseynovdan ibarət nümayəndə heyətinin vilayətə səfəri Azərbaycan xalqının dahi lideri Heydər Əliyevin abidəsi önünə əklil qoyulması ilə başlanmışdır. Azərbaycan xalqının ümummilli lideri Heydər Əliyev vaxtilə bir neçə dəfə Ulyanovsk şəhərində olmuşdur. Sovet dönəmində ali rəhbər vəzifədə işləyərkən Ulu Öndər bu şəhərin inkişafı ilə bağlı mühüm qərarların qəbul edilməsində bilavasitə iştirak etmişdir. Şəhər sakinləri dünya şöhrətli siyasi xadimin xatirəsini daim əziz tuturlar. Məhz buna görə də Ulyanovskın mərkəzi meydanlarından birinə Heydər Əliyevin adı verilmişdir. Bu meydanda Ulu Öndərin əzəmətli heykəli ucaldılmışdır. Abidənin açılışında Azərbaycan Prezidenti İlham Əliyev iştirak etmişdir.
Azərbaycan nümayəndə heyəti ilə görüşdə Ulyanovsk qubernatoru Sergey Morozov bildirmişdir ki, 2014-cü ildə Azərbaycana səfər etməyi planlaşdırır. O həmçinin vurğulamışdır ki, Azərbaycan diasporu vilayətin ən fəal, çoxsaylı diaspor təşkilatlarından biridir. Qubernator demişdir: “2014-cü ili Ulyanovskda “Azərbaycan ili” elan etməyi qərara almışıq. Regionumuz Azərbaycanla ikitərəfli əlaqələrdə maraqlıdır. Azərbaycan ilə humanitar sahədə layihələr həyata keçirmək niyyətindəyik. İkitərəfli münasibətlərimizi ümumi tariximiz və bu tarixi yaradan görkəmli şəxsiyyətlərimiz zəminində qururuq. Ulyanovsk vilayəti Rusiya-Azərbaycan münasibətlərinin inkişafı baxımından nümunəvi ərazidir”. S.Morozov açılışında Azərbaycan Prezidenti İlham Əliyevin iştirakı etdiyi Prezident körpüsünün yaxınlığında iki xalqın dostluq rəmzi kimi Dostluq Stellasının ucaldılacağını da vurğulamışdır.
Görüşdə Azərbaycan ilə Rusiya, o cümlədən Rusiya Federasiyasının subyektləri arasında sıx iqtisadi və humanitar əlaqələrin mövcudluğundan danışan Azərbaycan nümayəndə heyətinin rəhbəri Qüdsi Osmanov bildirmişdir ki, vilayətdə 2014-cü ildə elan olunacaq “Azərbaycan ili” çərçivəsində Azərbaycan mədəniyyəti günlərinin, biznes forumun və digər tədbirlərin keçirilməsi ikitərəfli münasibətlərin daha dinamik inkişafına xidmət edəcəkdir. Diplomat demişdir: “Azərbaycan Ulyanovsk kimi uğurla inkişaf edən regionla daha yüksək səviyyədə əməkdaşlıqda maraqlıdır. Ticarət-iqtisadi əlaqələrinin genişləndirilməsi üçün yaxşı perspektivlər vardır”. Diploma, həmçinin Ulyanovskda “Azərbaycan ili”nin keçirilməsi ideyasını dəstəkləmiş, Ulyanovskun qubernatoru Sergey Morozovu Azərbaycana səfərə dəvət etmişdir. O, həmçinin Ulyanovsk şəhərinin Azərbaycanın şəhərlərindən biri ilə qardaşlaşması təklifini irəli sürmüşdür.
Səfər zamanı hazırda bərpaya ehtiyacı olan Dostluq parkının yenidən qurulması, habelə Ulyanovsk şəhərində Qələbə parkının ərazisində Azərbaycan mədəni kompleksinin yaradılması məsələləri müzakirə olunmuşdur. Vilayət Kitab Sarayında keçirilən görüşdə Azərbaycanın Rusiyadakı səfirinin müavini Qüdsi Osmanov Heydər Əliyev Fondunun Azərbaycan haqqında nəfis tərtibatda nəşr etdirdiyi kitabları təqdim etmişdir. ÜAK-ın icraçı direktoru İlqar Hacıyev kitab evinə “Azərbaycan Konqresi” qəzetinin illik abunəsini hədiyyə etmişdir.
Volqayanı vilayətin Azərbaycan diasporunun fəalları ilə keçirilən görüşdə Ulyanovskun açıq hökumət məsələləri üzrə naziri Tatyana Kirillova çıxış edərək bildirmişdir ki, Azərbaycan diasporunun nümayəndələri Ulyanovskın zəngin və çoxşaxəli mədəniyyətinə öz töhfələrini verirlər. O demişdir: “Ulyanovsk vilayətində 100-dən çox millətin nümayəndəsi yaşayır. Azərbaycan diasporunun nümayəndələri regionun mədəni, iqtisadi, humanitar sahələrinin inkişafına öz layiqli töhfələrini verirlər”. Azərbaycanın Rusiyadakı səfirliyinin regionla əlaqələrə xüsusi önəm verdiyini vurğulayan T.Kirillova ikitərəfli əlaqələrin bundan sonra da inkişaf edəcəyinə əminliyini ifadə etmişdir.
Azərbaycan nümayəndə heyəti Ulyanovsk vilayətində Heydər Əliyev Fondunun dəstəyi ilə yenidən qurulmuş 78 saylı orta məktəbdə də olmuşlar. Məktəbdə Azərbaycan dilinin tədrisi üçün böyük zal ayrılmışdır, habelə Azərbaycan tarixi və mədəniyyəti muzeyi fəaliyyət göstərir. Məktəbin direktoru Gennadi Sarkovun sözlərinə görə, təmirə qədər məktəbdə 400 şagird təhsil alırdısa, hazırda şagirdlərin sayı 800 nəfərə çatmışdır.
Azərbaycan nümayəndə heyəti Ulyanovsk Daxili İşlər İdarəsində və Rusiya Federal Miqrasiya Xidmətinin Ulyanovsk vilayəti üzrə İdarəsində də görüşlər keçirmişdir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
