AZƏRBAYCAN PREZİDENTİ İLHAM ƏLİYEVİN BƏYANATI
- Hörmətli cənab Prezident!
Hörmətli qonaqlar!
Xanımlar və cənablar!
Bu gün Xorvatiyanın Prezidenti cənab Mesiçin Azərbaycana ilk rəsmi səfəridir və deyə bilərəm ki, səfərin yekunları çox uğurludur. Bu gün biz çox geniş fikir mübadiləsi apardıq. İkitərəfli münasibətlər geniş təhlil edildi. Gələcək əməkdaşlığımızın perspektivləri müəyyən olundu. Bildiyiniz kimi, iki il bundan əvvəl mən Xorvatiyaya rəsmi səfər etmişdim və o səfərdən sonra keçən dövr ərzində bizim aramızda həm siyasi, həm də iqtisadi əlaqələr inkişaf etməkdədir. Bu gün həm ikitərəfli münasibətlər, regional vəziyyət geniş şəkildə müzakirə olundu. Beynəlxalq məsələlərə diqqət yetirildi. Bildiyiniz kimi, sabah Xorvatiya-Azərbaycan biznes forumu keçiriləcək və əminəm ki, forumun yekunları da uğurlu olacaq və bizim aramızda iqtisadi əməkdaşlıq daha da sürətlə artacaqdır. Bunu deməyə böyük əsas var. İqtisadi potensial hər iki ölkədə artmaqdadır. İqtisadi islahatlar uğurla davam etdirilir. Qarşılıqlı maraq doğuran iqtisadi məsələlər kifayət qədər çoxdur. Mən əminəm ki, sabah keçiriləcək tədbirdə iqtisadi əməkdaşlığın yeni sahələri üzə çıxacaqdır. Biz bunda maraqlıyıq. Hesab edirik ki, çox fəal siyasi dialoqun aparılması ilə bərabər, iqtisadi əlaqələr də inkişaf etməlidir. Əlbəttə ki, forumda Xorvatiyanın potensialı Azərbaycan biznesmenləri üçün, Azərbaycanın potensialı Xorvatiya biznesmenləri üçün təqdim olunacaqdır.
Bu gün imzalanmış sənədlər də ölkələrimiz arasında münasibətlərin inkişafı üçün böyük əhəmiyyət kəsb edir. Həm iqtisadi sazişlər, həm də ki, Birgə bəyannamə. Bəyannamədə bizim siyasi niyyətlərimiz ifadə edilir. İkitərəfli münasibətlər, bizim beynəlxalq təşkilatlarda əməkdaşlığımız əks olunur. Xorvatiya və Azərbaycan Avratlantik strukturlarına inteqrasiya siyasətini uğurla aparır. Eyni zamanda, bölgənin ən böyük təhlükə mənbəyi olan Ermənistan-Azərbaycan, Dağlıq Qarabağ münaqişəsinin həlli yolları da müştərək bəyannamədə göstərilmiş və münaqişənin ölkələrin ərazi bütövlüyü, sərhədlərin toxunulmazlığı çərçivəsində həll olunması vurğulanmışdır. Hesab edirəm ki, bu, çox önəmli məsələdir, ikitərəfli münasibətlərimizin çox vacib elementidir və əlbəttə ki, gələcək birgə fəaliyyətimizdə Bəyannamədə əks olunan bütün müddəaları həyata keçirəcəyik.
Mən demək istəyirəm ki, ikitərəfli münasibətlərin çox gözəl perspektivləri var. Bizim ölkələrimiz yeni müstəqil dövlətlərdir. Hər ikisi vaxtilə başqa ölkələrin tərkibində olmuşdur və sadəcə, 15 ildən bir az çox müddət ərzində biz müstəqil ölkələr kimi yaşayırıq, inkişaf edirik. Artıq bütün dünya görür ki, müstəqil ölkələr kimi biz böyük uğurlar əldə edə bilmişik. Bu müddət ərzində münasibətlərimiz inkişaf edibdir. Ancaq ən sürətli inkişaf son bir neçə il ərzində olmuşdur və dövlət başçılarının qarşılıqlı səfərləri bunun əyani sübutudur. Aramızda imzalanmış sənədlər, aparılan danışıqlar və əməkdaşlığımızın gələcəyi deməyə əsas verir ki, iki ölkə öz aralarında münasibətlərin inkişafında bundan sonra da əməli səylər göstərəcəkdir. Mən bir daha hörmətli Prezident Mesiçi və nümayəndə heyətini Azərbaycanda salamlayıram və əmin olduğumu bildirmək istəyirəm ki, səfər çox uğurlu olacaq və bizim qonaqlarımız öz vətəninə ən xoş təəssüratlarla qayıdacaqlar.
Sağ olun.
Bölmənin digər xəbərləri
