Azərbaycan və Laos arasında münasibətlərin ən güclü tərəfləri qarşılıqlı siyasi etimaddır ŞƏRH
Bakı, 14 oktyabr, AZƏRTAC
Prezident İlham Əliyevin və Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı verdiyi bəyanat iki ölkə arasında münasibətlərin inkişafında yeni səhifənin açıldığını göstərib. Otuz ildən artıq davam edən diplomatik əlaqələrin möhkəm siyasi bazaya çevrilməsi və artıq bu bazanın iqtisadi, humanitar, nəqliyyat və digər istiqamətlərdə konkret əməkdaşlıq imkanları ilə tamamlanması diqqəti cəlb edən əsas məqamdır. Azərbaycan və Laos arasında münasibətlərin ən güclü tərəflərindən biri isə qarşılıqlı siyasi etimaddır. Hər iki ölkə beynəlxalq təşkilatlarda bir-birinə dəstək nümayiş etdirir, müxtəlif çoxtərəfli platformalarda əməkdaşlıq edir. Parlamentlərarası dostluq qruplarının yaradılması və hakim partiyalar arasında Anlaşma Memorandumunun imzalanması da siyasi münasibətlərin institusional əsaslarının möhkəmləndiyini göstərir.
Bu sözləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədr müavini Jalə Əliyeva deyib.
O qeyd edib ki, indi əsas məqsəd bu siyasi yaxınlığı iqtisadi nəticələrlə zənginləşdirməkdir. Prezident İlham Əliyevin qeyd etdiyi kimi, mövcud ticarət dövriyyəsi iki ölkənin real potensialını əks etdirmir. Bu baxımdan Bakıda keçirilən Laos-Azərbaycan biznes-forumu biznes dairələrinin bir araya gətirilməsi, qarşılıqlı investisiya imkanlarının araşdırılması və yeni layihələrin müəyyənləşdirilməsi üçün mühüm platforma oldu. Həmçinin Azərbaycanın son illər xarici investisiyalar coğrafiyasını genişləndirməsi ölkənin iqtisadi imkanlarının artmasının mühüm göstəricisidir. Azərbaycanın sərmayə qoyduğu ölkələrdə yeni istehsal sahələrinin və iş yerlərinin yaradılması bu siyasətin yalnız iqtisadi deyil, həm də inkişafyönümlü xarakter daşıdığının nümayişidir. Laosun konkret investisiya layihələri təqdim etməsi isə Azərbaycan investorlarının bu ölkədə yeni imkanları qiymətləndirməsinə şərait yarada bilər.
“Əməkdaşlığın daha bir mühüm istiqaməti nəqliyyat-logistika sahəsidir. Azərbaycan artıq mühüm beynəlxalq nəqliyyat dəhlizlərinin fəal iştirakçısı və regionun əsas logistika mərkəzlərindən biridir. Laosun qonşu dövlətlərlə dəmir yolu bağlantılarını inkişaf etdirməsi və gələcəkdə Trans-Xəzər marşrutuna çıxış əldə etmək niyyəti iki ölkə arasında yeni iqtisadi körpülərin yaranmasına imkan verir. Bu baxımdan Azərbaycan öz nəqliyyat infrastrukturundan istifadə etməklə Laosun dünya bazarlarına çıxış imkanlarının genişlənməsində mühüm tərəfdaşdır.
Energetika, mədənçilik və kənd təsərrüfatı kimi sahələrin də müzakirə olunması əməkdaşlığın kifayət qədər geniş potensiala malik olduğunu göstərir. Burada əsas prinsip konkret layihələrə, qarşılıqlı faydaya və nəticəyönümlü yanaşmaya söykənir. Prezident İlham Əliyevin vurğuladığı kimi, imkanların mövcudluğu ilə yanaşı, qarşılıqlı siyasi iradənin olması da olduqca vacibdir.
Humanitar əməkdaşlıq isə bu münasibətlərə xüsusi məna verir. Sovet dövründə laoslu tələbələrin Azərbaycanda təhsil alması iki ölkə arasında tarixən formalaşan humanitar əlaqələrin göstəricisidir. Bu ənənənin təqaüd proqramları vasitəsilə bərpası gələcəkdə Azərbaycanla Laos arasında yeni nəsil dostluq körpülərinin qurulmasına xidmət edə bilər.
Həmçinin minalarla mübarizə də iki ölkənin təcrübəsini birləşdirə biləcək mühüm istiqamətdir. Belə ki, Azərbaycan Ermənistanın işğalından azad edilmiş ərazilərdə mina təhlükəsinin aradan qaldırılması sahəsində geniş təcrübə toplayıb. Laosun da uzun illər mina probleminin fəsadları ilə üzləşməsi bu istiqamətdə təcrübə mübadiləsini, texnoloji əməkdaşlığı və mütəxəssis hazırlığını əhəmiyyətli edir”, - deyə deputat bildirib.
Jalə Əliyeva vurğulayıb ki, Prezident İlham Əliyevin səfər çərçivəsində səsləndirdiyi fikirlər Azərbaycan–Laos münasibətlərinin yeni mərhələsinin konturlarını aydın şəkildə ortaya qoyub. Birgə Bəyanat siyasi münasibətlərin gələcək istiqamətlərini müəyyənləşdirir, biznes-forumu iqtisadi əməkdaşlıq üçün yeni imkanlar açır, təhsil və mina təhlükəsizliyi humanitar gündəliyi genişləndirir, nəqliyyat layihələri isə iki ölkəni daha böyük regional və beynəlxalq iqtisadi proseslərə bağlayır. Bu mənada Thonqlun Sisulitin Azərbaycana ilk rəsmi səfəri iki dost ölkə arasında münasibətlərin daha sistemli və nəticəyönümlü tərəfdaşlıq səviyyəsinə yüksəlməsi baxımından mühüm hadisədir.
Bölmənin digər xəbərləri
