SİYASƏT
Azərbaycan və türk diaspor təşkilatları arasında əməkdaşlıq əlaqələri qarşılıqlı etimada əsaslanır
Bakı, 23 noyabr (AZƏRTAC). Diasporla İş üzrə Dövlət Komitəsinin sədri Nazim İbrahimov İstanbulun Kocaeli Böyükşəhər Bələdiyyəsinin sədri İbrahim Karaosmanoğlu ilə görüşmüşdür.
Komitədən AZƏRTAC-a verilən məlumata görə, görüşdə İ.Karaosmanoğlu Türkiyə ilə Azərbaycan arasında münasibətlərin dərin tarixi, etnik və mədəni köklərə malik olduğunu vurğulamış, ölkələrimiz arasında əlaqələrin yüksələn xətlə inkişaf etdiyini qeyd etmişdir. Türkiyə Azərbaycan Dərnəkləri Federasiyasının (TADEF) bu əlaqələrin inkişafına önəmli töhfələr verdiyini bildirən İ.Karaosmanoğlu təşkilatın fəaliyyətini yüksək qiymətləndirmişdir.
Bələdiyyə sədri açılışı gözlənilən Azərbaycan Mədəniyyət Evinin Türkiyədə Azərbaycanın daha yaxından tanıdılmasında mühüm rol oynayacağına əminliyini bildirərək burada mədəni tədbirlərin, elmi-praktiki konfransların keçirilməsi üçün yaxşı şəraitin yaradıldığını qeyd etmişdir. Vurğulanmışdır ki, bu mədəniyyət evi Azərbaycanın tarixi, incəsənəti, iqtisadiyyatını daha yaxşı tanıtmağa, ölkələrimiz arasında münasibətlərin bütün sahələrdə inkişafına xidmət edəcəkdir.
Türkiyə ilə Azərbaycanın qardaş və dost ölkələr olduğunu qeyd edən N.İbrahimov demişdir ki, Azərbaycan xalqının ümummilli lideri Heydər Əliyevin “Biz bir millət, iki dövlətik” kəlamı bu münasibətləri çox dəqiq ifadə edir. Bu gün bizim ölkələrimiz və xalqlarımız arasında olan qarşılıqlı etimad əlaqələrimizi daha da inkişaf etdirməyə və möhkəmləndirməyə imkan yaradır.
Bu gün Azərbaycan və türk diaspor təşkilatları arasında əməkdaşlıq əlaqələrinin də məhz qarşılıqlı etimada əsaslandığını vurğulayan komitə sədri TADEF-in fəaliyyətinə verilən dəstəyə və Azərbaycan Mədəniyyət Evi üçün binanın ayrılmasına görə təşəkkür edərək bu addımın iki xalq arasında qardaşlıq münasibətlərindən qaynaqlandığını demişdir.
Səfər çərçivəsində N.İbrahimov Kocaeli valisi Ercan Topaca ilə də görüşmüşdür.
Xalqlarımız arasında qardaşlıq münasibətlərini yüksək qiymətləndirən E.Topaca vurğulamışdır ki, birlikdə həyata keçirilən layihələr sayəsində iki qardaş və dost ölkənin regionda və dünyada nüfuzu getdikcə artmışdır. Türkiyə ilə Azərbaycanın sürətlə inkişaf etdiyini deyən Kocaeli valisi qarşılıqlı sərmayə yatırımlarının da burada mühüm rol oynadığını qeyd etmişdir.
TADEF-in həyata keçirdiyi layihələrin əhəmiyyətini yüksək qiymətləndirən E.Topaca demişdir: “Bəzən Türkiyədə də Azərbaycanı daha yaxından tanıdan, təbliğ edən layihələrə ehtiyac duyulur. Bu baxımdan TADEF-in üzərinə böyük məsuliyyət düşür. İnanıram ki, Azərbaycan Mədəniyyət Evi də bu istiqamətdə uğurlu fəaliyyət göstərəcəkdir”.
N.İbrahimov TADEF-in ən fəal diaspor təşkilatlarından biri olduğunu və təşkilatın Türkiyədə Azərbaycan tarixinin və mədəniyyətinin təbliği üçün bir sıra uğurlu layihələrə imza atdığını vurğulamışdır.
E.Topacanı Azərbaycana səfərə dəvət edən komitə sədri bu cür qarşılıqlı səfərlərin əməkdaşlığın genişləndirilməsində mühüm rol oynayacağını demişdir.
Tezliklə Azərbaycana gəlməyə çalışacağını deyən E.Topacan Kocaelidən olan iş adamlarının da ölkəmizə, Azərbaycandan olan iş adamlarının isə Kocaeliyə səfərlərinin hər iki tərəf üçün faydalı olacağına əminliyini bildirmişdir.