Azərbaycanın turizm nümayəndəliyinin Təl-Əviv ofisində “Açıq qapı” günü keçirilib
Bakı, 10 noyabr, AZƏRTAC
Noyabrın 9-da Zəfər Günü və Bayraq Günü ilə əlaqədar ölkəmizin turizm imkanlarının təqdimatı məqsədilə Azərbaycanın İsraildəki turizm nümayəndəliyinin Təl-Əviv ofisində “Açıq qapı” günü keçirilib.
Dövlət Turizm Agentliyindən AZƏRTAC-a bildirilib ki, “Açıq qapı” günündə ofisi ziyarət edənlərə, həmçinin diaspor üzvləri, xarici tələbələr, turizm üzrə tərəfdaşlar və Təl-Əvivdə yerləşən diplomatik missiyaların əməkdaşlarına Azərbaycanın turizm imkanları, işğaldan azad edilmiş ərazilərin turizm potensialı, Qarabağda aparılan bərpa və yenidənqurma işləri, həmçinin regionun tarixi və mədəni irsi haqqında, eləcə də Azərbaycandakı zəngin yəhudi irsi haqqında ətraflı məlumat verilib.
Tədbir çərçivəsində İsraildə fəaliyyət göstərən Dona Qrasiya Diplomatiya Mərkəzinin təsisçisi və rəhbəri, həmçinin Qarabağ mövzusunda müxtəlif məqalələrin müəllifi olan, işğaldan azad olunan ərazilərə bir neçə dəfə səfər etmiş politoloq və jurnalist Reyçel Abraham tərəfindən regionun və Qarabağ münaqişəsinin tarixi haqqında təqdimat həyata keçirilib.
İsraildə Azərbaycanın turizm nümayəndəliyinin Təl-Əviv ofisinin açılışı cari ilin mart ayında baş tutub. Nümayəndəliyin fəaliyyəti İsraildə Azərbaycan haqqında məlumatlılığın artmasına və ikitərəfli turizm əlaqələrinin möhkəmlənməsinə yönəlib.
Qeyd edək ki, cari ilin yanvar-oktyabr aylarında Azərbaycana səfər edən İsrail vətəndaşlarının sayı 22 min 83 nəfər təşkil edib ki, bu da ötən ilin eyni dövrü ilə müqayisədə 4.4 dəfədən çox artım deməkdir.
Bölmənin digər xəbərləri
