AzMİU-da 20 Yanvar şəhidlərinin xatirəsi anılıb
Bakı, 19 yanvar, AZƏRTAC
Azərbaycan Memarlıq və İnşaat Universitetində (AzMİU) tariximizə Qanlı Yanvar faciəsi kimi daxil olmuş 20 Yanvar hadisələrinin ildönümü ilə bağlı tədbir keçirilib.
Əvvəlcə şəhidlərin xatirəsinin əbədiləşdirilməsi üçün universitetdə yaradılmış xatirə kompleksinin önünə gül qoyulub və ölkəmizin bütövlüyü, suverenliyi uğrunda canından keçən şəhidlərin xatirəsi ehtiramla yad edilib.
AzMİU-dan AZƏRTAC-a bildirilib ki, ictimaiyyətlə əlaqələr və sosial məsələlər üzrə prorektor Orxan Naqdiyev 20 Yanvar hadisələri, bu hadisələrə gətirib çıxaran siyasi-ictimai proseslər haqqında danışıb. Prorektor bildirib ki, 1987-ci ilin sonlarında yenidən ortaya atılmış qondarma Dağlıq Qarabağ problemi Azərbaycanın ərazi bütövlüyünün pozulmasına, torpaqlarımızın işğalına, Ermənistanda və Dağlıq Qarabağda yaşayan yüz minlərlə azərbaycanlının öz doğma yurdlarından qovulmasına yönəlmişdi və SSRİ rəhbərliyi buna göz yumurdu, hətta Ermənistana bu çirkin niyyətində yardım edirdi. Baş verənlərin nəticəsi olaraq respublikada geniş sosial spektrli xalq hərəkatının yarandığını və proseslərin gedişinin tədricən milli azadlıq hərəkatına çevrildiyini deyən Orxan Naqdiyev qeyd edib ki, Bakıya ordu yeridilməsi və qırğın törədilməsi xalqımızın milli azadlıq müqavimətinin qırılmasına yönəlik addım idi. Prorektor çıxışında 20 Yanvar hadisələrinin ictimai-siyasi əhəmiyyətinə toxunub. Bildirib ki, yalnız Ulu Öndər Heydər Əliyevin xidmətləri sayəsində dünya bu hərbi cinayətdən xəbərdar olub və hadisəyə hüquqi-siyasi qiymət verilib.
O bildirib ki, 20 Yanvar hadisələri zamanı AzMİU-nun tələbələri Fuad Babayev, Ələsgər Qayıbov və məzunları Bayram Əliyev, Mehman Muradov ölkəmizin və xalqımızın azadlığı uğrunda canını fəda edərək şəhid olublar.
Milli Məclisin deputatı Naqif Həmzəyev çıxışında 20 Yanvar hadisələrini Azərbaycan xalqının milli-azadlıq mücadiləsinə qarşı qəsd adlandırıb. Deputat qeyd edib ki, 1990-cı ilin 20 yanvarında Azərbaycan xalqı öz azadlığı və müstəqilliyi uğrunda çoxlu şəhid versə də, onun iradəsi sınmadı və milli ruhu sarsılmadı. Həmin qırğın zamanı ümummilli mənafelərin müdafiəsi naminə canlarından keçmiş və şəhidlik zirvəsinə ucalmış Vətən övladları misilsiz fədakarlıqları ilə xalqımızın qəhrəmanlıq salnaməsinə yeni parlaq səhifə yazdılar.
Çıxışlardan sonra 20 Yanvar faciəsi haqqında film izlənilib.
Bölmənin digər xəbərləri
