Bakı, 1 aprel (AZƏRTAC). Aprelin 3-də Bakı Ekspo Mərkəzində Azərbaycan və bütün Qafqaz regionunda turizm sənayesinin böyük ixtisaslaşdırılmış tədbirlərindən biri - 13-cü Azərbaycan Beynəlxalq turizm və səyahətlər sərgisi ("AITF-2014") açılacaqdır.

Mədəniyyət və Turizm Nazirliyinin mətbuat xidmətindən AZƏRTAC-a bildirmişlər ki, "AITF" sərgisi regionun müasir turizm bazarının ümumi mənzərəsini əks etdirməklə yanaşı, dünyanın müxtəlif bölgələrini koloriti ilə nümayiş etdirən aparıcı beynəlxalq sərgi statusunu qazanmışdır. Artıq 13 ildir ki, bu sərgi turizm sənayesi nümayəndələrinin görüşü üçün beynəlxalq platforma kimi fəaliyyət göstərir.

"AITF" sərgisi Azərbaycan Respublikası Mədəniyyət və Turizm Nazirliyinin rəsmi dəstəyi ilə keçirilir. Həmçinin sərgiyə Dünya Turizm Təşkilatı (UNWTO), Beynəlxalq Turizm Sərgiləri Assosiasiyası (İTTFA), Azərbaycanda İxracın və İnvestisiyaların Təşviqi Fondu (AZPROMO) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) tərəfindən dəstək göstərilir.

Bu sərgi Dünya Sərgi Sənayesi Assosiasiyası ("UFİ") tərəfindən təqdir olunur. Sərginin təşkilatçıları qismində "Iteca Caspian" MMC və onun Böyük britaniyalı tərəfdaşı "ITE Groupplc" şirkətləri çıxış edirlər. "ITE Groupplc" şirkətinin tərəfdaş və agentlərindən ibarət şəbəkəsi, o cümlədən "ITE London", "EUF" (Тürkiyə), "GIMA" (Almaniya) və "ITE Gulf" (Dubay) beynəlxalq şirkətlərin Azərbaycanda keçirilən sərgilərdə iştiraka cəlb edilməsində fəal rol oynayırlar.

Sərgilərin rəsmi otelləri "JW Marriott Hotel Absheron Baku" və "Qafqaz Point Hotel" mehmanxanaları, rəsmi turoperatoru isə "Greenwich Travel Club" şirkətidir. 2014-cü ildə keçiriləcək bütün sərgilərin təhlükəsizlik üzrə rəsmi tərəfdaşı "SafeLife" şirkətidir.

Sərgi iştirakçılarının 60 faizindən çoxunu xarici iştirakçılar təşkil edirlər. Onlar xüsusi olaraq Azərbaycan bazarı üçün işlənib hazırlanmış eksklüziv turizm təkliflərini təqdim edəcəklər. Sərgi iştirakçılarının 40 faizi yerli şirkətlərdən ibarətdir.

Sərgidə milli stendlərin fəal iştirakı ilə yanaşı, Argentina, Bolqarıstan, Macarıstan, Yunanıstan, Gürcüstan, Dominikan Respublikası, Misir, Zaqreb (Xorvatiya), Hindistan, İndoneziya, İtaliya, Çin, Malayziya, Mərakeş, Sloveniya, Stavropol diyarı (Rusiya), Tailand, Türkiyə, Soçi (Rusiya), Fransa, Monteneqro və Çex Respublikasından 24 milli və regional qrup iştirak edəcəkdir.

Azərbaycanda keçirilən bu turizm sərgisinin daimi iştirakçılarından biri, dəfələrlə "AİTF"in tərəfdaşı olmuş Bolqarıstan isə bu il sərgiyə qeydiyyat üzrə sponsor qismində çıxış edir. Sərgiyə VIP səviyyəli qonaqların gəlişi beynəlxalq peşəkar ictimaiyyət tərəfindən göstərilən marağı bir daha təsdiq edir. Bu il sərgiyə Bolqarıstan, Gürcüstan, Rusiya və Monteneqrodan turizm sənayesi üzrə beynəlxalq ekspertlər, Stavropol diyarından, eləcə də digər ölkələrdən nümayəndə heyətləri edəcəklər.

"AITF -2014" sərgisi çərçivəsində turizm sənayesi üzrə mühüm tədbirin - BMT-nin Dünya Turizm Təşkilatı Avropa Komissiyasının 57-ci iclası və turizm klasterlərinin səmərəli inkişafı üzrə seminarın keçirilməsi nəzərdə tutulmuşdur. Bu görüş, ümumilikdə, turizm sənayesi üçün əlamətdar hadisə olacaq və bu sahədə Azərbaycanın beynəlxalq əlaqələrinin daha da gücləndirməsinə şərait yaradacaqdır. İclas və seminar iştirakçıları sərgi üzrə VIP-turda iştirak edəcəklər.

Bu ilki sərginin yeni ölkə və istiqamətləri Argentina, Dominikan Respublikası, Çin və Xorvatiyanın Zaqreb şəhəridir. Birillik fasilədən sonra Hindistan, Yunanıstan və Malayziya, ilk dəfə isə Şri-Lanka, Keniya və Cənubi Afrika Respublikasının turizm şirkətləri sərgidə iştirak edəcəklər.

"AITF -2014"də tibbi turizm istiqamətini nümayiş etdirən iştirakçıların sayı əhəmiyyətli dərəcədə artmışdır. Bu turizm istiqamətinə xarici tibbi mərkəzlər, özəl və dövlət klinikaları, eləcə də Almaniya, Yunanıstan, İsrail, Kipr, Litva, Rusiya, Türkiyə və İsveçrənin diaqnostika mərkəzləri daxildir. Azərbaycan sanatoriyaları bütün dünyada məşhur olan Naftalan neftinin müalicəvi xassələrini nümayiş etdirəcəklər. Həmçinin sərgidə ilk dəfə olaraq Litva Tibbi Turizm Klasterinin ("LITCARE") və Türkiyə Tibbi Turizm Assosiasiyasının ("THTC") tibbi turizm xidmətləri üzrə klasterlərinin himayəsi altında olan şirkətlər də iştirak edəcəklər.

Sərginin bu il inkişaf etdirdiyi daha bir istiqamət isə xaricdə daşınmaz əmlak sektorudur. Bu sektorda iştirakçı şirkətlər yerli daşınmaz əmlak agentliklərinə Türkiyə, Kipr və Avropanın digər ölkələrinin istirahət zonalarında yaşayış yerlərinin və ofislərin satışı, icarəsi, habelə hüquqi məsləhət xidmətləri ilə bağlı əməkdaşlıq təklif edirlər. Azərbaycan regionlarının milli pavilyon çərçivəsində irimiqyaslı iştirakı sərginin maraqlı və koloritli hadisəsindən biridir. Azərbaycan üzrə turizm paketinin müxtəlifliyi istənilən turizm menyusunu zənginləşdirə bilər.

Regional ekspozisiyada Azərbaycanın 22 regionu- Qəbələ, Qax, Gədəbəy, Quba, Qusar, Gəncə, Zaqatala, İsmayıllı, Lənkəran, Lerik, Masallı, Mingəçevir, Oğuz, Tovuz, Xaçmaz, Xızı, Şamaxı, Şəmkir, Şəki, Naxçıvan Muxtar Respublikası və Sumqayıt şəhərinin turizm və mədəniyyət departamenti iştirak edəcəkdir. Burada turizm fəaliyyətinin müxtəlif növləri, o cümlədən kənd və ekoloji turizm, salçılıq, dağ-xizək və dəniz kurortları və s. üçün imkanlar nümayiş etdiriləcəkdir. Regional ekspozisiyada 60-a yaxın otel iştirak edəcəkdir (bu otellərin bir neçəsi qlobal mehmanxana şəbəkələrinə daxildir). Bundan əlavə, Azərbaycan Turizm Assosiasiyası öz stendində ölkəmizin aparıcı otellərini və turizm agentliklərini bir araya gətirəcəkdir.

Sərgi çərçivəsində iştirakçıların stendlərində təqdimat və seminarların keçirilməsi, habelə müxtəlif lotereya və yollayışların oynanılması planlaşdırılmışdır. Sərgi ilk iki iş günü ərzində yalnız turizm sənayesinin mütəxəssisləri üçün açıq olacaq və bu mütəxəssislər sərgi meydançasından danışıqların aparılması, tərəfdaş axtarışı, bazarda imicin gücləndirilməsi və digər həmkarlarının yeniliklərinin qiymətləndirilməsi üçün işgüzar platforma kimi istifadə edə biləcəklər. Aprelin 5-də isə sərgiyə giriş fərdi şəxslər üçün açıq olacaqdır. Ziyarətçilərin müraciətləri nəzərə alınaraq sərginin sonuncu iş günü şənbə gününə keçirilmişdir. Burada da istirahət üçün gözəl ideyalarla tanışlıq mümkün olacaqdır.

"AITF" sərgisi ilə eyni vaxtda regionda otel və restoran sənayesinin yeganə ixtisaslaşdırılmış tədbiri -8-ci Qafqaz Beynəlxalq otel, restoran və supermarketlər üçün avadanlıq və ləvazimatlar sərgisi ("Horex Caucasus -2014") də keçiriləcəkdir.

"AITF" və "Horex Caucasus" sərgiləri ilə bağlı ən son xəbərlər operativ olaraq sərgi saytlarında və sosial şəbəkələrdə yerləşdiriləcəkdir. Həmçinin bu sərgilərdə iştirak edən şirkətlər barədə rəsmi kataloq çap olunmuşdur və sərginin rəsmi qəzetinin ("DailyNews. AITF-2014") nəşri planlaşdırılmışdır. Bu qəzetdə sərgi iştirakçıları və tədbirlər barədə məlumatlar dərc olunacaqdır. Bundan əlavə, sərgi ziyarətçilərinin rahatlığı üçün metronun "Nəriman Nərimanov" stansiyasından Bakı Ekspo Mərkəzinə və geriyə pulsuz avtobuslar təşkil edilmişdir.

Təşkilatçılar http://aitf.az/2014/?p=visitors_fast_register internet səhifəsində fəaliyyət göstərən elektron xidmət - onlayn qeydiyyatdan fəal şəkildə yararlanmağı tövsiyə edirlər. Cəmi bir neçə dəqiqə çəkən bu prosedur Bakı Ekspo Mərkəzində qeydiyyat zamanı sərf olunan vaxta xeyli qənaət etməyə imkan yaradacaqdır. Beləliklə, sərgi geniş turizm imkanları ilə tanışlıq üçün aprelin 3-4-də turizm sənayesinin peşəkarları, aprelin 5-də isə bütün səyahət həvəskarları üçün açıq olacaqdır.

Aprelin 2-də "Trend" xəbərlər şirkətinin mətbuat mərkəzində 13-cü Azərbaycan Beynəlxalq turizm və səyahətlər və 8-ci Qafqaz Beynəlxalq mehmanxana, restoran və supermarketlər üçün avadanlıq və ləvazimatlar sərgilərinin açılışına həsr olunmuş mətbuat konfransı keçiriləcəkdir.