Bakıdan ikiillik dünya turuna çıxmış tanınmış azərbaycanlı velosipedçi Ramil Ziyadov Moskvada olmuşdur
Moskva, 2 aprel (AZƏRTAC). Yanvarın 10-da “Azərbaycan naminə” devizi altında Bakıdan ikiillik dünya turuna çıxmış tanınmış azərbaycanlı velosipedçi Ramil Ziyadov Moskvada olmuşdur.
Burada velosipedçi Qırmızı meydanı gəzmiş, Nizami Gəncəvinin və Müslüm Maqomayevin abidələrini ziyarət etmişdir.
Moskvada Ramil Ziyadov Azərbaycanın Rusiyadakı səfirinin müavini Qüdsi Osmanov ilə görüşmüşdür.
Ramil Ziyadov bundan əvvəl Azərbaycanın ümummilli lideri Heydər Əliyevin 90 illik yubileyinə həsr olunmuş “Mən fəxr edirəm ki, azərbaycanlıyam” devizi altında dünyanın beş ölkəsinə velosiped yürüşünə çıxması, Azərbaycan bayrağı ilə Rusiya, Qazaxıstan, Özbəkistan, Qırğızıstan və Çindən keçməsi barədə danışmışdır. Velosipedçi, həmçinin Moskvadan Sankt-Peterburqa, daha sonra isə Belarus, Ukrayna, Moldova, son nəticədə isə Afrika qitəsinə getməyi planlaşdırdığını da söyləmişdir.
Qüdsi Osmanov azərbaycanlı velosipedçinin bu təşəbbüsünü yüksək qiymətləndirmiş, ölkəmizin Rusiyadakı səfirliyinin Azərbaycanın təbliği naminə səyahətində ona dəstək olacağını vurğulamış, yol macəralarını lentə alması üçün Ramil Ziyadova fotoaparat hədiyyə etmişdir.
Xatırladaq ki, Ramil Ziyadov budəfəki veloturunda 45 min kilometr məsafə qət etmək niyyətindədir.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
