BÖYÜK ÖMRÜN SƏHİFƏLƏRİ
AZƏRTAC xəbər verir ki, Qazaxıstanın paytaxtı Astanada çıxan “Miras” ictimai-siyasi almanaxı növbəti nömrəsində“Heydər Əliyev: Vətənin xilası missiyası” başlığı altında Azərbaycanın tanınmış yazıçı və publisisti, Milli Məclisin deputatı Elmira Axundovanın kitabından parçalar dərc etmişdir. Ümummilli lider Heydər Əliyevin 85 illik yubileyi münasibətilə dərc olunan yazı oxucuları müstəqil Azərbaycanın ən yeni tarixinin dramatik dövrlərindən birinə qaytarır. O zaman, 1993-cü ilin yayında Heydər Əliyev xalqın tələbi ilə siyasi hakimiyyətə qayıtmışdı ki, ölkəni dərin böhrandan və iqtisadi fəlakətdən qurtarsın.
Elmira Axundova üzərində 5 ildən artıq işlədiyi çoxcildli “Heydər Əliyev. Şəxsiyyət və Zaman” roman-tədqiqatını ömrünün ən əhəmiyyətli işi sayır. Əsərdə nadir sənədlərdən, müasirlərin xatirələrindən istifadə olunur, görkəmli rəhbərin həyatının bir çox naməlum məqamlarından söhbət açılır. Qazaxıstanda çıxan digər bir nəşr - “Niva” ədəbi-bədii və ictimai-siyasi jurnalı isə E.Axundovanın yazısına verdiyi ön sözdə əsərin məhz bu keyfiyyətlərini ön plana çəkir. Jurnalın oxucularına təqdim etdiyi “Qalstuksuz Əliyev” başlıqlı bu fəsildə romanın qəhrəmanı qeyri-rəsmi şəraitdə - ailə üzvlərinin əhatəsində, təsadüfi istirahət dəqiqələrində təsvir edilir, onun həyat və davranış tərzindən, vərdişlərindən söhbət açılır.
Qeyd edək ki, romandan parçalarla yanaşı, hər iki jurnal ölkəmizin Qazaxıstandakı səfiri Lətif Qəndilovun məqalələrini də dərc etmişdir. Hazırda dünya birliyinin nüfuzlu dövlətlərindən birinə çevrilən müstəqil Azərbaycanın qurucusu Heydər Əliyevin misilsiz xidmətlərindən söz açan diplomat deyir ki, dahi lideri qardaş qazax xalqı ilə çox şey, o cümlədən Nursultan Nazarbayevlə səmimi şəxsi münasibətlər bağlayırdı. Zamanın ağır sınağından şərəflə çıxan bu iki şəxsiyyət xalqlarımız arasında dostluğun rəmzinə çevrilmişlər.
Bölmənin digər xəbərləri
