BRÜSSELDƏ AZƏRBAYCAN RESTORANI AÇILMIŞDIR
AZƏRTAC-ın xüsusi müxbiri xəbər verir ki, xaricdəki soydaşlarımız doğma vətənlərini yaşadıqları ölkədə tanıtdırmaq, onunla bağlı həqiqətləri yaymaq, xalqımızın adət-ənənələri, mədəniyyət, incəsənəti və zəngin mətbəxi ilə yerli sakinləri tanış etmək üçün hər bir imkandan istifadə edirlər.
Belçikda yaşayan soydaşlarımız Orxan Babayev və Vüqar Hüseynov da elə bu məqsədlə Brüsselin mərkəzində «Qafqaz-Azərbaycan mətbəxi» adlı restoran açmışlar. Restoranın girəcəyində Azərbaycanın və Belçikanın bayraqları əks olunmuşdur. Restoranın daxili isə ölkəmizin bir parçasını xatırladır. Divarlardan Qız qalasının, Neft daşlarının, Şirvanşahlar sarayının təsvir edildiyi şəkillər, Azərbaycanda toxunmuş və üzərində tarixi abidələrimizin əks olunduğu xalça asılmışdır. Stolların üzərində fransız və ingilis dillərində yazılmış «Azərbaycan yeməkləri» menyusu qoyulmuşdur.
Restoranda mətbuat guşəsi vardır. Burada müştərilər Azərbaycan dilində nəşr edilən «Azərbaycan-Benilüks nyus», Azərbaycan və fransız dillərində çıxan «Azərbaycan xəbərləri» qəzetləri vasitəsilə ölkəmiz barədə ətraflı məlumat əldə edə bilirlər.
Bundan əlavə, televiziya ekranında Azərbaycanın tarixi, mədəniyyəti, incəsənətinə dair videomateriallar nümayiş etdirilir.
Restoranda müştərilərə Azərbaycan milli yeməkləri - kabablar, plovlar, dolmalar, dovğa və sair, ölkəmizdə istehsal olunmuş içkilər təklif olunur.
İxtisasca həkim olan Orxan Babayev deyir ki, müxtəlif ölkələrin paytaxtlarında və böyük şəhərlərində dünyanın istənilən dövlətinin adını daşıyan restoranların olması məndə bir növ qibtə hissi doğururdu. Nəhayət, fevral ayının 20-də istəyinə çatmış və dostu Vüqarla birlikdə restoranı açmağa müvəffəq olmuşdur.
Artıq restoran özünü tanıtdra bilmişdir. Burada səfirliyin əməkdaşları bu ölkədə yaşayan azərbaycanlılarla yanaşı, belçikalılar da Azərbaycanın ləziz yeməklərini dadmaq imkanı əldə etmişlər.
Paytaxt sakini Jofrun Erbiet xörəklərimiz barədə xoş sözlərini ifadə edərək demişdir: ”Zəngin Azərbaycan mətbəxi ilə ilk tanışlığım bu restoranda olmuşdur. Azərbaycanlı dostlarımdan dadlı yeməkləriniz barədə dəfələrlə eşitsəm də, onların dadına baxmaq imkanı əldə edə bilməmişdim. Məhz bu restoran Azərbaycan mətbəxi barədə məndə böyük təəssürat yaratmışdır. Zəngin mətbəxi olan xalqın həm tarixi, həm mədəniyyəti, həm incəsənəti, həm də musiqisi qədim və zəngin olmalıdır. Mən inanıram ki, təkcə restoran açmaqla deyil, digər vasitələrdən də istifadə etməklə Belçikada Azərbaycanı yaxşıca tanıtmaq olar, iki ölkə arasında dostluq və mədəni əlaqələr daha da inkişaf edər. Dostlarım Azərbaycan haqqında o qədər danışıblar ki, görmədən, bilmədən Azərbaycana vurulmuş və yaxın vaxtlarda bu ecazikar ölkəyə səyahət etməyi qərara almışam”.
Bölmənin digər xəbərləri
