Bu torpağa qurban getmiş şəhidlərimizin ruhunun şad olması xatirinə irəli Azərbaycan əsgəri!
Naxçıvan, 7 oktyabr, AZƏRTAC
Bu gün Azərbaycan xalqı vahid bir yumruq kimi birləşərək sentyabrın 27-dən etibarən 30 ilə yaxın bir müddətdə işğal altında qalan ərazilərimizin azad edilməsi üçün əks-hücum əməliyyatı aparan qüdrətli ordumuzu dəstəkləyir, qəhrəman Azərbaycan əsgəri ilə fəxr edir!
AZƏRTAC-ın Naxçıvan bürosuna müsahibəsində bu sözləri AMEA Naxçıvan Bölməsinin Batabat Astrofizika Rəsədxanasının direktoru, fizika-riyaziyyat üzrə fəlsəfə doktoru, dosent Qulu Həziyev deyib.
“Reallıq budur ki, BMT Təhlükəsizlik Şurasının həyata keçirə bilmədiyi qərarlarını bu gün igid əsgərlərimiz əzm, iradə, cəsarət və böyük ruh yüksəkliyi ilə həyata keçirirlər. Azərbaycan Prezidenti, Ali Baş Komandan İlham Əliyev dünyanın aparıcı kütləvi informasiya vasitələrinə verdiyi müsahibələrdə də birmənalı olaraq vurğulayır ki, işğal altında olan torpaqlarımızın azad olunması bizim haqqımızdır və bunu qürur hissi ilə yerinə yetiririk”, - deyən Qulu Həziyev bildirib ki, bu gün bütün dünya Azərbaycanın öz torpaqlarını azad etməyə qadir olduğunu və bunda qətiyyət nümayiş etdirdiyini bir daha görmüş oldu. Təəssüf ki, 30 ilə yaxındır Azərbaycanın haqq səsini eşitməyənlər indi atəşkəs tələb edirlər. Artıq gecdir ağalar! Biz torpaqlarımızı son qarışına qədər düşməndən azad edəcəyik!
Həzi Quliyev vurğulayıb ki, bu gün Azərbaycan əsgəri silahı ilə tarix yazır, Azərbaycan dövlətinin zəfər tarixini yazır. Bu gün hər bir azərbaycanlı ordumuzla fəxr edir. İnanırıq ki, yaxın zamanlarda qürur mənbəyimiz olan üçrəngli bayrağımız işğaldan azad edilən torpaqlarımızda dalğalanacaq və Azərbaycan xalqının həyatında yeni bir dövr, əbədiyyətə qədər davam edəcək xoşbəxtlik dövrü başlanacaq! Yolumuz uğurlu olsun! İrəli Azərbaycan əsgəri! Azadlıq üfüqlərində görünən Qələbəyə doğru irəli! 30 ildən artıq bir müddətdə bu torpağa qurban getmiş şəhidlərimizin ruhunun şad olması xatirinə irəli! Biz hamımız sənin yanındayıq!
Bölmənin digər xəbərləri
