Cenevrədə Azərbaycanın Müstəqillik Günü münasibətilə rəsmi qəbul təşkil olunub
Vyana, 7 iyun, AZƏRTAC
Azərbaycan Respublikasının Cenevrədəki BMT Bölməsi və digər beynəlxalq təşkilatlar yanında daimi nümayəndəliyində Müstəqillik Günü münasibətilə rəsmi qəbul keçirilib.
AZƏRTAC xəbər verir ki, Ümumdünya Səhiyyə Assambleyasının illik sessiyasında iştirak etmək məqsədilə Cenevrədə səfərdə olan Azərbaycanın səhiyyə naziri Teymur Musayev, ölkəmizin İsveçrədəki səfiri Fuad İsgəndərov, BMT-nin və Cenevrədə yerləşən digər beynəlxalq təşkilatların nümayəndələri, Cenevrədə akkreditə olunmuş diplomatik korpusun üzvləri və Azərbaycan diasporunun təmsilçiləri tədbirə qatılıblar.
Əvvəlcə Azərbaycanın Dövlət Himni səsləndirilib, ölkəmizin ərazi bütövlüyü uğrunda mübarizədə canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Tədbirdə açılış nitqi ilə çıxış edən ölkəmizin Cenevrədəki BMT Bölməsi və digər beynəlxalq təşkilatlar yanında daimi nümayəndəsi səfir Qalib 1918-ci il mayın 28-də müsəlman Şərqində ilk demokratik respublika olan Azərbaycan Xalq Cümhuriyyətinin yaradıldığını, çoxmədəniyyətli və çoxkonfessiyalı Azərbaycanın rəmzi olan üçrəngli Bayrağının təsdiq edildiyini xatırladıb, çoxmillətli parlamentin təsis olunduğunu, bir sıra demokratik ölkələrdən əvvəl qadınlara səsvermə hüququnun verildiyini bildirib. Cəmi 23 ay mövcud olmasına baxmayaraq, Xalq Cümhuriyyətinin Azərbaycan millətinin kimliyinin formalaşmasına xüsusi töhfə verdiyi diqqətə çatdırılıb.
Səfir vurğulayıb ki, ərazilərini işğaldan azad etmiş, ərazi bütövlüyünü və suverenliyini tam bərpa etmiş Azərbaycanın Müstəqillik Günü bu il ilk dəfə olaraq bütün ölkə ərazisində qeyd olunub. Ərazilərimizin işğaldan azad edilməsi ilə 1 milyondan çox soydaşımızın öz doğma yurdlarına qayıtmasına şərait yaranıb. Bildirilib ki, hazırda Azərbaycan regionda sülh gündəliyini təşviq edir, bölgənin inkişaf, sabitlik və təhlükəsizlik məkanına çevrilməsinə səy göstərir. Qeyd olunub ki, Azərbaycan bir sıra çoxformatlı əməkdaşlıq təşəbbüsləri irəli sürüb, qonşu ölkələr və tərəfdaşlar həmin təşəbbüslərə maraq göstərir. Azad edilmiş ərazilərdə genişmiqyaslı bərpa-quruculuq işlərinin həyata keçirildiyini diqqətə çatdıran səfir beynəlxalq tərəfdaşları bu səylərə dəstək verməyə çağırıb.
Səhiyyə naziri Teymur Musayev çıxışında müsəlman Şərqində ilk demokratik respublika olan Azərbaycan Xalq Cümhuriyyətinin (AXC) yaradılmasının tarixi hadisə olduğunu deyib. Diqqətə çatdırıb ki, Xalq Cümhuriyyəti mövcud olduğu 23 ay ərzində böyük nailiyyətlər qazanıb, Dövlət Bayrağı və Dövlət Himni qəbul olunub, Milli Ordu qurulub, qadınlara səsvermə və bərabər siyasi hüquqların verildiyi ilk müsəlman ölkəsi olub. Nazir bildirib ki, Sovet İttifaqı dağılandan sonra 1991-ci ildə Azərbaycan müstəqilliyinin bərpa olunduğunu elan edib. 1993-cü ilin Azərbaycanın müasir tarixində dönüş nöqtəsi olduğunu vurğulayan nazir Ümummilli Lider və müasir Azərbaycanın qurucusu Heydər Əliyevin dövlətçiliyimizin möhkəmləndirilməsinə nəhəng töhfələr verdiyini deyib, müxtəlif sahələrdə islahatlar həyata keçirdiyini diqqətə çatdırıb.
Qeyd olunub ki, Prezident İlham Əliyevin bölgəmizdə və regionumuzdan kənarda sülh, sabitlik və tərəqqinin təmin olunması istiqamətində həyata keçirdiyi müdrik, ardıcıl siyasət nəticəsində ölkəmiz beynəlxalq münasibətlər sisteminin vacib iştirakçısına çevrilib.
Bildirilib ki, Azərbaycan hər zaman “yaşıl” gündəliyə sadiq qalır. Azərbaycanın bu il COP29-a ev sahibliyi etməsi ölkəmizin dünyada iqlim dəyişikliyi ilə mübarizəyə verdiyi töhfənin yüksək qiymətləndirildiyinin göstəricisidir.
Sonda qonaqlara Azərbaycan milli mətbəxinin təamlarından ibarət ziyafət verilib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
