Cənub bölgəsinə yağan yağışlar Lerik rayonunun Bürsülüm kəndində torpaq sürüşməsinə səbəb olmuşdur
Lerik, 28 oktyabr (AZƏRTAC). Son günlər cənub bölgəsinə yağan yağışlar Lerik rayonunun mərkəzindən 50 kilometr aralıda yerləşən Bürsülüm kəndində torpaq sürüşməsinə səbəb olmuşdur.
AZƏRTAC xəbər verir ki, Bürsülüm ərazi vahidliyinin tərkibinə 8 kənd daxildir, burada 1500-ə qədər əhali yaşayır. Kənd sakinlərinin sözlərinə görə, ərazidə sürüşmə sentyabrın 15-dən başlamışdır. Sürüşmə zonası təqribən 5 hektar ərazini əhatə edir. Təbii fəlakət nəticəsində 3 tikilidə çatlar əmələ gəlmişdir.
Lerik rayon fövqəladə hallar komissiyasının sədri Habil Məlikov bildirmişdir ki, torpaq sürüşməsi barədə Nazirlər Kabinetinə məlumat verilmişdir. Ekologiya və Təbii Sərvətlər Nazirliyinin, FHN-in mütəxəssisləri əraziyə baxış keçirmişlər.
Hələlik kənddə torpaq sürüşməsi passiv olsa da, yağışlı havalarda intensivləşəcəyi istisna edilmir.
Bölmənin digər xəbərləri
