Çin və Tailand kosmosda, o cümlədən Ayda forpostlar quracaq
Bakı, 5 aprel, AZƏRTAC
Çin Kosmik Agentliyi bildirib ki, cümə günü Çin ilə Tailand arasında kosmosdan dinc məqsədlərlə istifadə və beynəlxalq Ay tədqiqat stansiyaları üzrə əməkdaşlığa dair ilkin paktlar imzalanıb.
AZƏRTAC Çin mediasına istinadla xəbər verir ki, iki ölkənin imzaladığı anlaşma memorandumlarına uyğun olaraq, məlumat mübadiləsi və kadr hazırlığını əhatə edən kosmik tədqiqatlar və tətbiqlər üzrə birgə işçi qrupu yaradılır.
Çin Milli Kosmik Administrasiyasının (CNSA) bəyanatında deyilir ki, iki ölkə, həmçinin Ay tədqiqat stansiyalarının qiymətləndirilməsi, mühəndisliyi və idarə edilməsi planları üzrə əməkdaşlıq etmək barədə razılığa gəliblər.
Agentlik əlavə edib ki, Çin 2023-cü ildə “Chang'e-7” Ay zond missiyası üçün Tailand tərəfindən hazırlanmış kosmik hava monitorunu seçib.
Təxminən 2026-cı ildə işə salınacaq “Chang'e-7” missiyası Ayın cənub qütbündəki resursları tədqiq edəcək və Yerin təbii peykində insanların uzunmüddətli yaşayışını təmin edəcək. Çin 2030-cu ilə qədər Aya astronavt göndərməyi hədəfləyir.
Bölmənin digər xəbərləri
