Tokio, 12 aprel, AZƏRTAC 

Yaponiyanın geniş tamaşaçı auditoriyasına malik “TV Asahi” televiziya kanalında martın 1-dən 31-dək “Azərbaycan - gələcəyin ölkəsi” adlı xüsusi videoçarx nümayiş etdirilib. AZƏRTAC-ın Yaponiyadakı xüsusi müxbiri Azərbaycanın müxtəlif yerlərinə həsr olunan və ay ərzində hər iş günü nümayiş etdirilən həmin videoçarxın müəllifi, “Telecom Staff Inc.” şirkətinin direktoru Hayaşi Daysuke ilə görüşərək ondan müsahibə alıb. Müsahibəni təqdim edirik.

- Cənab Daysuke, “TV Asahi” telekanalında Azərbaycan haqqında sizin müəllifi olduğunuz reklam çarxı bir ay nümayiş etdirildi. Necə oldu ki, belə bir videoçarx hazırlamaq qərarına gəldiniz?

- Doğrusunu deyim ki, Azərbaycan mövzusu son illər Yaponiyada çox geniş əks-səda doğurub. Ölkəniz haqqında heç bir məlumatım olmasa da, Azərbaycanı yaxından öyrənmək və həmvətənlərimə daha ətraflı tanıtmaq məqsədilə belə bir videoçarx hazırlamaq qərarına gəldim.

- Çəkiliş zamanı Azərbaycanın hansı yaşayış məntəqələrində oldunuz? Bu yaşayış məntəqələrini hansı əlamətlərinə görə seçdiniz?

- Qeyd etdiyim kimi, Azərbaycan barədə məlumatım olmadığına görə, əvvəlcədən marşrutun planını hazırlamaq çox çətin idi. Buna görə də qərara gəldim ki, məhz Bakıya çatdıqdan sonra bunun üzərində işləyim. Yəni, maraqlı yerləri, tarixi abidələri, zəngin təbiəti, mədəniyyəti olan əraziləri müəyyənləşdirim və həmin istiqamətlərdə çəkilişlər aparım. Bir də mən adi vaxt heç kimin diqqətini cəlb etməyən məqamlar barədə də məlumatlar toplamaq niyyətində idim.

Haqqında çox eşitdiyim Qafqaz dağları mövzusu məni çox cəlb edirdi. Xüsusən bu dağların arasında yerləşən və insanların uzaq keçmişdən bəri yaşadığı kəndlər, onların həyat tərzi, mədəniyyəti ilə bağlı çəkilişlər aparmaq istəyirdim. Düşündüm ki, xüsusən İpək yolu üzərindəki yaşayış məntəqələri bu baxımdan çox maraqlı ola bilər. Marşrutun seçilməsində Misirdə turizm sahəsində çalışan, Bakını yaxşı tanıyan yapon dostum və Azərbaycanın Mədəniyyət və Turizm Nazirliyinin əməkdaşı mənə kömək etdilər. Bakıdan başladığım yol Sumqayıt, Şamaxı, Quba, Qəbələ, İsmayıllı, Şəki, Gəncə, Göygöl və Lerik kimi şəhər və rayonlardan keçdi. Orijinallığı ilə seçilən qədim Xınalıq kəndi də daxil olmaqla, Azərbaycanda gördüyüm yaşayış məntəqələri, yerli sakinlərin səmimiyyəti məni heyran etdi.

-Çəkiliş boyunca hansı maraqlı məqamlarla qarşılaşdınız, gördüyünüz yerlərdən hansı sizdə daha çox təəssürat doğurdu?

- Düzünü deyim ki, gəzdiyim bütün rayonlar, kəndlər müasir inkişafı, yeni infrastruktur layihələri ilə diqqəti cəlb edirdi. Xüsusən Qəbələ mənim daha çox xoşuma gəldi. Burada müasir turizm, insanların istirahəti və əyləncəsi üçün hər cür şərait var. Xizəklə sürüşmə mərkəzi ilə tanış olarkən mənim diqqətimi onun arxasında yerləşən kənd cəlb etdi. Kəndin adı Daşca idi. Bu kənddə bizə dedilər ki, cümə günü olduğuna görə kişilər məsciddədirlər. Biz də oraya yollandıq. Kənd camaatı bizi çox böyük qonaqpərvərliklə qarşıladı, çay, yemək təklif etdi. Düzü, yerli sakinlərin dünyanın sonu sayılan Yaponiyadan gəlmiş, ilk dəfə gördükləri, tanımadıqları insana göstərdikləri diqqət və qonaqpərvərlik məni heyran etdi. İslam dini ilə əlaqədar dünyada gedən proseslər, yaponların bu dinə münasibəti barədə suala cavab olaraq bildirdim ki, bu din həqiqətən xeyirxahlıq, mərhəmət, insanlar arasında birlik və bərabərlik kimi amallara xidmət edir və bu, mənim çox xoşuma gəlir. Mənim bu cavabım onları qane etdi və həmin söhbət mənim özümə də çox xoş təsir bağışladı. Düşünürəm ki, həmin görüş heç vaxt mənim yadımdan çıxmayacaq. Ümumiyyətlə, qeyd edim ki, Azərbaycan tolerantlığı ilə də diqqətimi cəlb etdi. Burada müxtəlif dinlərə sitayiş edənlər çox mehriban qonşuluq şəraitində yaşayırlar. Mən bunu videoçarxda da göstərməyə çalışmışam.

Bir də Lerik rayonunda Uzunömürlülər muzeyini heç vaxt unutmayacağam. Yaponiya bütün dünyada uzunömürlü insanlar ölkəsi kimi tanınsa da, düşünürəm ki, Azərbaycana çata bilməz. Çəkiliş zamanı tanış olduğum 107 yaşlı Lerik sakini xüsusən məndə xoş təəssüratlar oyatdı. Bu insan çox səmimi, mehriban və gülərüz idi. Söhbətimiz zamanı onun tükənməz enerjisi daim hiss olunurdu.

- Bəs çəkiliş zamanı hansısa çətinliklərlə qarşılaşdınızmı?

- Səmimi deyim ki, həm səfər, həm də çəkilişlər zamanı heç bir çətinliklə, problemlə qarşılaşmadıq. Hər yerdə insanlar bizi çox mehriban, səmimi, xüsusi qonaqpərvərliklə qarşılayırdılar. Bəzi islam ölkələrindən fərqli olaraq, sizin insanlar kameradan qaçmır, çəkilişdən imtina etmirdilər. Onların xoş münasibəti, gülən simaları bizi daha həvəslə işləməyə ruhlandırırdı. İstər kişilər, istər qadınlar, istərsə də uşaqlar bizimlə məmnuniyyətlə söhbət edir, suallarımızı ətraflı cavablandırırdılar. Bu, videonun üzərinə oxunacaq mətni hazırlamağa çox kömək etdi. Məhz bu məlumatlar əsasında mən özüm mətni hazırladım. Videoçarx işlənərkən isə həmin mətni Kabuki teatrının məşhur aktyorlarından olan Bandou Mineske oxudu.

- Azərbaycan, onun paytaxtı Bakı, olduğunuz rayonlar ümumilikdə sizə necə təsir bağışladı?

- Azərbaycan ərazi cəhətdən çox böyük ölkə olmasa da, əsrarəngiz təbiəti, möhtəşəm dağları, gözəl meşələri ilə diqqəti cəlb edir. Burada hər bir rayon öz təbii şəraiti - yüksək dağları, yamacları və ya düzənlikləri ilə diqqəti cəlb edir. Bu baxımdan, düşünürəm ki, Azərbaycana dəfələrlə səfər etmək və hər dəfə yeni videoçarxlar hazırlamaq olar.

Bakıya gəlincə, həqiqətən də çox möhtəşəm, gözəl paytaxtınız var. Məni ən çox təəccübləndirən həm paytaxtda, həm də digər yaşayış məntəqələrindəki təmizlik, səliqə-sahman oldu. İçərişəhər isə insanı sanki bir anın içində uzaq keçmişə aparır. Buranı kifayət qədər gəzməyə vaxtım olmadığına görə hələ də təəssüf hissi keçirirəm. Böyük məmnuniyyətlə bu yerdə günlərlə qalardım.

- Azərbaycanla bağlı növbəti layihələriniz, perspektivlər barədə nə deyə bilərsiniz?

- Qeyd etdiyim kimi, Azərbaycan öz gözəlliyi, tarixi, müasirliyi və insanları ilə məni heyran etdi. Mən böyük məmnuniyyətlə yenidən bu ölkəyə səfər edərək görmədiyim yerlər haqda yeni filmlər hazırlamaq istərdim. İşlədiyim proqramlardan biri velosipedlə dünyanı səyahət etməyi və qarşılaşdığımız yerlər barədə videoçarxlar hazırlamağı planlaşdırır. Çox istəyirəm ki, həmin proqram çərçivəsində yenidən Azərbaycana səfər edim və daha rəngarəng çəkilişlər aparım.

- Maraqlı müsahibəyə görə çox sağ olun.

Vüqar Ağayev

AZƏRTAC-ın xüsusi müxbiri

Tokio