DÜNYA AZƏRBAYCANLILARININ HƏMRƏYLİYİ GÜNÜ ƏRƏFƏSİNDƏ
TORONTODA AZƏRBAYCAN GECƏSİ
AZƏRTAC Kanadadakı Azərbaycan diasporu nümayəndələrinin ölkəmizin səfirliyi tərəfindən dəstəklənən çoxşaxəli fəaliyyətindən dəfələrlə yazmışdır. Biz bu ilin yayında dahi Motsartın 250 illik yubileyinə həsr olunmuş “Niaqarada kamera musiqisi” beynəlxalq festivalında Azərbaycan bəstəkarlarının da əsərlərinin səsləndiyini xəbər vermişdik. O zaman Kanada simfonik orkestrinin ifasında dahi Üzeyir Hacıbəyovun “Motsart mövzusunda fantaziya” əsəri alqışlarla qarşılanmışdı. Musiqi bayramında Kanadada yaşayan həmvətənimiz, bəstəkar və dirijor İsmayıl Hacıyevin “Klassik üslubda konsertino” əsəri də yüksək qiymətləndirilmişdir. Məhz həmin beynəlxalq musiqi festivalından sonra İsmayıl Hacıyevin adı, - yeri gəlmişkən, o, görkəmli Azərbaycan bəstəkarı Cövdət Hacıyevin və tanınmış rəqqasə Əminə Dilbazinin oğludur, - Kanada Ali Bədii Şurasının qərarı ilə ölkənin ən yaxşı bəstəkarları siyahısına daxil edilmişdir.
Kanadalıları ölkəmizin musiqi sənəti ilə daha yaxından tanış etmək üçün daha bir fürsət yaranmışdır. Torontoda Dünya azərbaycanlılarının həmrəyliyi günü şərəfinə Azərbaycan gecəsi keçiriləcəkdir.
İndi artıq kanadalıların yaxşı tanıdıqları İsmayıl Hacıyevin rəhbərlik etdiyi “İpək yolu” kamera orkestrinin ifasında Azərbaycan Respublikasının himni ilə başlanacaq konsertdə Üzeyir Hacıbəyovun “Koroğlu” operasından uvertüra, Qara Qarayevin, Cövdət Hacıyevin əsərləri, muğam üçlüyünün ifasında “Qarabağ şikəstəsi”, xalq mahnıları təqdim olunacaqdır. Şübhəsiz ki, bayram konsertinə gələnlər Kanada Azərbaycan Cəmiyyətləri Federasiyasının nəzdində yaradılmış “Təbriz” özfəaliyyət rəqs qrupunun çıxışını da maraqla qarşılayacaqlar.
Konsert proqramına Türkiyənin və digər ölkələrin Kanadadakı diaspor təşkilatlarını təmsil edən musiqiçilərin çıxışları da daxil edilmişdir.
Həmyerlimiz İsmayıl Hacıyevin gələcək planları böyükdür. Tezliklə o, Birləşmiş Ştatların paytaxtında, daha dəqiq desək, Ağ evin yaxınlığındakı Corc Vaşinqton adına salonda Azərbaycan xalqının ümummilli lideri, planetdə sülh uğrunda alovlu mübariz Heydər Əliyevin xatirəsinə həsr olunmuş konsert verəcəkdir. Konsert “Musiqi bütün dünyada sülh uğrunda” adlanacaqdır.
Kanada Azərbaycan Cəmiyyətləri Federasiyasının prezidenti Əkbər Məcidovun Bakıya göndərdiyi məktubda daha sonra deyilir ki, Torontoda keçiriləcək Azərbaycan gecəsində Kanadanın nazirləri, parlamentin nümayəndələri və digər yüksək vəzifəli şəxsləri, habelə Azərbaycan səfirliyinin əməkdaşları iştirak edəcəklər.
Məktubun müəllifi əmin olduğunu bildirmişdir ki, bu cür tədbirlər dövlətlər arasında münasibətlərə müsbət təsir göstərir, dünyanın böyük tarixə, qədim mədəni ənənələrə, zəngin müasir incəsənətə malik bir diyar olan Azərbaycanı daha yaxından tanımasına kömək edir.
Bölmənin digər xəbərləri
