Ekologiya və Təbii Sərvətlər Nazirliyində kollegiya iclası keçirilib
Bakı, 23 fevral, AZƏRTAC
Ekologiya və Təbii Sərvətlər Nazirliyində struktur bölmələrinin və tabeli qurumların rəhbərlərinin iştirakı ilə geniş kollegiya iclası keçirilib.
Nazirliyin mətbuat xidmətindən AZƏRTAC-a bildirilib ki, iclasda nazir Hüseyn Bağırov 2015-ci il ərzində ekologiya və ətraf mühitin mühafizəsi sahəsində görülmüş işlər, qazanılmış nailiyyətlər və qarşıda duran vəzifələr barədə məlumat verib. Nazir dövlət başçısının ekologiya və ətraf mühitin mühafizəsi ilə əlaqədar məsələləri daim diqqət mərkəzində saxladığını, ətraf mühitin mühafizəsinin yaxşılaşdırılması istiqamətində aparılan işlərə böyük dəstək verdiyini, bu istiqamətdə iri layihələrin uğurla həyata keçirildiyini vurğulayıb. Kollegiya iclasında nazirliyin ayrı-ayrı qurumları tərəfindən 2015-ci il ərzində görülmüş işlər qiymətləndirilib və işlərində buraxdıqları nöqsanlar müzakirə olunub.
Sonra tabeli qurumların rəhbərlərinin 2015-ci ilin yekunları ilə bağlı hesabatları dinlənilib. Dinlənilən məruzələrlə bağlı aparılan müzakirələrdə müvafiq qurumlarda görülmüş müsbət işlərlə yanaşı, nöqsanlar da qeyd olunaraq iradlar bildirilib.
Kollegiyanın sədri Hüseyn Bağırov dövlət başçısının son müşavirələrdəki çıxışlarından irəli gələn, Ekologiya və Təbii Sərvətlər Nazirliyi qarşısında qoyulmuş vəzifələrin vaxtında və keyfiyyətli icrası üçün nazirliyin struktur bölmələrinə konkret tapşırıqlar verib, bu vəzifələrin icrası ilə bağlı müasir tələblərə cavab verən strateji planların hazırlanması üçün müvafiq komissiyaların yaradılması barədə qərar qəbul edilib.
Kollegiya iclasında cari məsələlər də müzakirə edilib. İclasın sonunda Kollegiyanın qərarı ilə 2016-cı il üçün iş planı təsdiq edilib.
Bölmənin digər xəbərləri
