Ermənistanda baş verənlər: insan hüquqları tapdalanır, Qərb isə susur
Bakı, 28 iyun, AZƏRTAC
Son günlər Ermənistanda siyasi və dini institutlara qarşı aparılan sərt əməliyyatlar, yüksək vəzifəli şəxslərin, o cümlədən iş adamı Samvel Karapetyanın və bəzi parlament üzvlərinin saxlanılması, Eçmiədzin kilsəsi ilə açıq qarşıdurmalar bu ölkədə insan hüquqlarının sistematik şəkildə pozulduğunun bariz nümunələridir. Erənistanın baş naziri Nikol Paşinyan hakimiyyətinin daxili siyasi təmizləmə kampaniyası artıq təkcə siyasi rəqibləri deyil, dini institutları da hədəfə alıb. Həbs edilənlərə qarşı irəli sürülən ittihamlar isə ya ümumi və qeyri-müəyyəndir, ya da prosessual şəffaflıqdan uzaq şəkildə aparılır.
Bu sözləri AZƏRTAC-a açıqlamasında politoloq Tural İsmayılov deyib.
O bildirib ki, Samvel Karapetyan uzun illər Ermənistan iqtisadiyyatında və siyasətində mühüm rol oynamış fiqurlardan biri kimi tanınırdı. Onun saxlanılması və ictimaiyyətə verilən ziddiyyətli açıqlamalar bu prosesin hüquqi deyil, daha çox siyasi motivli olduğunu göstərir. Eyni zamanda, deputat toxunulmazlığı olan şəxslərin həbsi Ermənistan konstitusiyasının və demokratik prinsiplərin ciddi şəkildə pozulması deməkdir. Eçmiədzinə və orada təmsil olunan yüksək rütbəli kilsə rəhbərlərinə qarşı kampaniya isə dini azadlıqların və vicdan azadlığının pozulması kimi qiymətləndirilməlidir.
Maraqlıdır ki, bu cür hadisələr nə ATƏT-in Demokratik Təsisatlar və İnsan Hüquqları Bürosu tərəfindən, nə Avropa Şurası, nə də digər beynəlxalq hüquq müdafiə təşkilatları tərəfindən adekvat şəkildə qiymətləndirilmir. Halbuki, Azərbaycanda ən kiçik inzibati hadisə belə baş verdikdə, həmin qurumlar bir-birinin ardınca bəyanatlarla çıxış edir, tələblər irəli sürür və hesabatlar hazırlayırlar. Bu isə açıq-aydın ikili standartların və seçici yanaşmanın göstəricisidir.
"Qərb institutlarının Ermənistandakı proseslərə səssiz qalması regionda ədalətli vasitəçilik imicinə ciddi zərbə vurur. Demokratiya anlayışı hər kəsə və hər yerə bərabər tətbiq edilməlidir. Əgər hansısa hüquq müdafiə təşkilatı Azərbaycanda baş verən bir inzibati saxlanılmanı “demokratik hüquqların məhdudlaşdırılması” kimi qiymətləndirirsə, Ermənistandakı sistemli təzyiqlər, siyasi həbs dalğaları və dini institutlara qarşı zorakılıq niyə eyni ciddiyyətlə şərh olunmur?
Beynəlxalq hüquq prinsipləri bütün dövlətlərə eyni məsafədə dayanmağı tələb edir. Amma Ermənistanın daxili repressiya siyasətinə göz yumulması, bəzi dairələrin bu ölkəni Qafqazın "demokratik qalası" kimi göstərmək cəhdləri artıq gülünc və ifşaedici xarakter alıb. Reallıq budur ki, Ermənistanda müxalifətə, medianın sərbəst fəaliyyətinə, ictimai fəallara və indi də dini liderlərə qarşı təzyiqlər sistemli hal alıb.
Bu fonda Azərbaycanın öz milli maraqlarını müdafiə etməsi və beynəlxalq qurumlara adekvat cavablar verməsi tam legitim və rasional mövqedir. İkili standartlarla diktə olunan hüquq və demokratiya anlayışlarını qəbul etmək mümkün deyil. Regionun təhlükəsizliyi və inkişafı üçün real vəziyyətin düzgün qiymətləndirilməsi və obyektiv mövqe sərgilənməsi əsas şərtdir.
Azərbaycan cəmiyyəti bu ikili münasibətləri görür və buna siyasi cavab verməkdə qərarlıdır. Dövlət qurumları və ictimai institutlar beynəlxalq platformalarda bu ədalətsizlikləri üzə çıxarmağa davam edir. Ermənistanda dini institutların və siyasi fiqurların hədəfə alınması isə təkcə daxili siyasət məsələsi deyil, bu, regionda qarşılıqlı inamı zədələyən təhlükəli tendensiyadır.
Əgər Qərb bu münasibətini dəyişməzsə və Ermənistandakı bu tendensiyalara susmaqda davam edərsə, gələcəkdə regionda demokratik institutlara inam tamamilə itəcək. Belə şəraitdə isə real siyasət diktə edən, obyektiv və öz hüquqlarını qətiyyətlə müdafiə edən dövlətlər möhkəmlənəcək. Azərbaycan da bu istiqamətdə öz mövqeyini həm regional, həm də beynəlxalq səviyyədə qətiyyətlə ortaya qoyur",- deyə T. İsmayılov vurğulayıb.
Bölmənin digər xəbərləri
