Fernando Siskar: Bakıdakı Milli Gimnastika Arenası yarışlar üçün ideal məkandır
Bakı, 19 fevral, AZƏRTAC
Yarışların dörd növü üzrə finala çıxa biləcəyimizə və iki medal qazanacağımıza ümid edirəm.
AZƏRTAC xəbər verir ki, bu sözləri Bakıda təşkil olunan dünya kuboku yarışlarında çıxış edən kişi idman gimnastikası üzrə İspaniya yığma komandasının baş məşqçisi Fernando Siskar deyib.
İspaniyalı mütəxəssis ötən il ilk Avropa Oyunlarında iştirak etmək üçün Bakıya səfər etdiyini xatırladıb. Bildirib ki, yetirməsi Rayderley Migel Sapata Santana birinci Avropa Oyunlarında sərbəst hərəkətlərdə qızıl medal qazanmışdı. “Buna görə də Milli Gimnastika Arenası bizə tanışdır. Arena yarışlar üçün ideal məkandır və əvvəlki uğurlarımızı təkrarlamaq istərdim”, - deyə baş məşqçi vurğulayıb.
Bölmənin digər xəbərləri
