Gürcüstanın müdafiə naziri: Yaşıl enerji layihəsi tarixi əhəmiyyət kəsb edir
Tbilisi, 21 dekabr, AZƏRTAC
Azərbaycanın və Gürcüstanın müdafiə nazirləri Türkiyədə görüşüblər.
AZƏRTAC xəbər verir ki, Gürcüstan Müdafiə Nazirliyinin yaydığı məlumatda görüşdə regionda təhlükəsizlik, sülh və sabitlik məsələlərinin diqqət mərkəzində olduğu bildirilib. Qeyd edilib ki, nazirlər sülh, sabitlik və təhlükəsizliyin qorunmasının vacibliyini vurğulayıblar. Görüşdə, eyni zamanda, birgə həyata keçirilən mühüm layihələr müzakirə edilib.
Cuanşer Burçuladzenin sözlərinə görə, yaşıl enerji layihəsinin həyata keçirilməsi tarixi əhəmiyyət kəsb edir və bunu bir neçə gün əvvəl Gürcüstan, Azərbaycan, Rumıniya və Macarıstan liderlərinin imzaları da təsdiqləyib.
Görüşdə tərəflər, həmçinin müdafiə sahəsində ikitərəfli əməkdaşlığın istiqamətlərini, o cümlədən hərbi təhsil sahəsində əməkdaşlıq və çoxmillətli hərbi təlimlərdə birgə iştirak məsələlərini müzakirə ediblər.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
