Helsinkidə ABŞ-Şimali Avropa ölkələrinin sammiti keçiriləcək
Bakı, 13 iyul, AZƏRTAC
İyulun 13-də Helsinki şəhəri Finlandiya tarixində ilk dəfə olaraq ABŞ və Şimali Avropa ölkələrinin sammitinə ev sahibliyi edəcək.
AZƏRTAC xəbər verir ki, ABŞ Prezidenti Cozef Bayden sammitdən öncə Finlandiyanın dövlət başçısı Sauli Niinistö ilə 40 dəqiqəlik görüşəcək. Bundan sonra onların Şimali Avropa ölkələrinin baş nazirləri ilə görüşü olacaq. Görüşdə İsveçin Baş naziri Ulf Kristerssonun, Norveçin Baş naziri Yonas Qar Störenın, Danimarkanın Baş naziri Mette Frederiksenin və İslandiyanın Baş naziri Katrin Yakobsdottirin iştirakı gözlənilir.
Liderlər üç saat davam edəcək sammit çərçivəsində Şimali Avropa ölkələri ilə Birləşmiş Ştatlar arasında təhlükəsizlik, ətraf mühit və texnologiyalar sahəsində daha sıx əməkdaşlıq məsələlərini müzakirə edəcəklər.
Xatırladaq ki, analoji zirvə görüşü sonuncu dəfə yeddi il əvvəl - 2016-cı ildə Vaşinqtonda keçirilmişdi.
Ekspertlər ABŞ Prezidenti Cozef Baydenin iştirakı ilə keçirilən sammitin Finlandiyanın neytral statusdan imtina edərək kollektiv Qərb düşərgəsinə keçməsinin əlaməti hesab edirlər.
Bölmənin digər xəbərləri
