Həmvətənimiz Kiyevdə doktorluq dissertasiyasını uğurla müdafiə etmişdir
Kiyev, 29 noyabr (AZƏRTAC). Noyabrın 28-də Ukrayna Ali Radasının Qanunvericilik İnstitutunda Ukrayna Milli Aviasiya Universitetinin Beynəlxalq Münasibətlər İnstitutunun beynəlxalq hüquq kafedrasının professoru Arif Quliyev “Beynəlxalq terrorizmlə mübarizədə prezidentlik institutu: Ukrayna və Azərbaycan Respublikası qanunvericiliklərinin müqayisəli-hüquqi təhlili” mövzusunda doktorluq dissertasiyasını uğurla müdafiə etmişdir.
Dissertasiya işi terrorizmlə mübarizənin beynəlxalq-hüquqi tənzimlənməsi mexanizminin kompleks öyrənilməsinə, terrorizmlə mübarizə sahəsində prezident institutunun fəallaşdırılması modelinin milli xüsusiyyətləri və xarakter cəhətlərinin açılmasına, milli qanunvericilikdə beynəlxalq antiterror normalarının həyata keçirilməsi istiqamətlərinin müəyyən edilməsinə həsr olunmuşdur.
Dissertasiya şurasının sədri, Ukrayna Milli Elmlər Akademiyasının müxbir üzvü, hüquq elmləri doktoru, professor Aleksandr Kopılenko Arif Quliyevi uğurlu müdafiə münasibətilə təbrik etmişdir. Ukrayna elminin inkişafına verdiyi böyük töhfəyə görə təşəkkürünü bildirmişdir.
Arif Quliyev elmi və müəllimlik fəaliyyətləri ilə yanaşı, diasporumuzda da fəal ictimai iş aparır, Ukrayna Azərbaycanlıları Konqresinin (UAK) İdarə Heyətinin üzvüdür.
Dissertasiyanın müdafiəsində Azərbaycanın Kiyevdəki səfirliyinin əməkdaşları, UAK-ın sədri Hikmət Cavadov, “Azərbaycançılıq institutu” Beynəlxalq İctimai Təşkilatının və Ukrayna elmi elitasının nümayəndələri iştirak etmişlər.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
