HEYDƏR ƏLİYEV PROSPEKTİNDƏ TUNEL YOLUN VƏ YERALTI PİYADA KEÇİDİNİN AÇILIŞI OLMUŞDUR
Azərbaycan Prezidenti İlham Əliyev dekabrın 25-də paytaxtın Heydər Əliyev prospektində tunel yolun və yeraltı piyada keçidinin açılışında iştirak etmişdir.
Nəqliyyat naziri Ziya Məmmədov dövlətimizin başçısına məlumat verdi ki, prospektin bu hissəsində aparılmış yenidənqurma işləri buradan keçən dəmir yol körpüsünün çıxacaq hissəsində təhlükəsizliyin təmin olunmasına imkan verir. Bundan əlavə, dəmir yolu bu istiqamətdə hərəkət edən avtomobillərə mane olmur. Əsas yola yardımçı olan bu tunel 2 zolaqlı və birtərəflidir. Eni 7 metr olan yoldan ən çox ətraf qəsəbələrin sakinləri istifadə edəcəklər. Mövcud tunelə paralel digər bir tunel isə gələn ilin martında istifadəyə veriləcəkdir.
X X X
Yeraltı piyada keçidinin açılışında Prezident İlham Əliyevə məlumat verildi ki, 4 ay ərzində aparılan yenidənqurma işləri nəticəsində 67 metr uzunluğu olan keçid tamamilə yeni görkəm almışdır. Yenidənqurma işlərini “Sanur holdinq” şirkətlər qrupu yerinə yetirmişdir. Paytaxtda ilk dəfə bu keçidin çıxışı üzərinə şüşə örtük çəkilmişdir. Bu, həm də keçidin memarlıq görünüşünə xüsusi yaraşıq verir. Burada istifadə olunan inşaat materialları İtaliya, İspaniya və Türkiyədən gətirilmişdir. Bu keçid intensiv hərəkətin olduğu magistral yolda piyadaların rahat hərəkətini təmin edəcəkdir.
Dövlətimizin başçısına, həmçinin məlumat verildi ki, Heydər Əliyev prospekti və Ağa Nemətulla küçəsinin kəsişməsində inşa olunan avtomobil tunelində işlər davam edir. Tunelin gələn ilin birinci rübündə istifadəyə verilməsi planlaşdırılır. Onun hündürlüyü 5 metr, eni 10 metr, uzunluğu 287 metr, hərəkət zolağının eni isə 8,5 metr nəzərdə tutulur.
######
 |
 |
 |
 |
Bölmənin digər xəbərləri
