İran və onun çıxıntıları İsrail-Azərbaycan dostluğunda söz sahibi ola bilməz - ŞƏRH
Bakı, 7 aprel, AZƏRTAC
İki gün əvvəl İran parlamenti mollavari bir bəyanat yayaraq Azərbaycanın İsraildə səfirlik açmasını İslam dünyasının mənafelərinə zidd addım kimi pisləməsi, ilk növbədə, beynəlxalq hüququn ən azı üç ümumtanınmış prinsipi - "dövlətlərin daxili işinə qarışmamaq", "dövlətlərin bir-biri ilə əməkdaşlıq etməsi" və nəhayət, "dövlətlərin suveren bərabərliyi" prinsiplərinin kobud pozuntusudur, təbii ki, səssiz qalmaq bu pozuntuya ortaq olmaq deməkdir. Ona görə də və BMT nizamnaməsinə və beynəlxalq normalara bu cür açıq təcavüz BMT Baş Assambleyası səviyyəsində pislənməlidir.
Bunu Milli Məclisin deputatı Bəhruz Məhərrəmov AZƏRTAC-a açıqlamasında söyləyib.
“Necə olur ki, İran 30 il işğal altında qalan Azərbaycan torpaqlarında məscidləri, ziyarətgahları, Məhəmməd ümmətinin qəbirlərini dağıdan Ermənistana fasiləsiz hərbi-siyasi, maddi-mənəvi kömək edəndə, işğala, təcavüzə açıq dəstək verəndə, məscidləri donuz damına çevirənlərə arxa duranda, işğal status-kvosunun davam etməsi üçün ərazilərimizə diversantlar, hərbi dəstələr göndərəndə bu islam mənafelərinə zidd olmurdu, amma Azərbaycanın haqq işinə açıq dəstək verən İsraildə səfirlik açmaq islam mənafelərinə zidd olur!? Molla parlamentinin "islam təəssübkeşliyi" bəs 30 il ərzində bir milyondan artıq müsəlman yurd-yuvasından didərgin düşəndə harada idi?
Özü təcavüzkar Ermənistanda böyük bir heyətlə səfirlik açır, həssas bir dönəmdə Qərbi Zəngəzurda - Qafanda heç bir siyasi-iqtisadi zərurət olmadan konsulluq açaraq hədyan bəyanatlar verərkən islami dəyərlər İranın yadına niyə düşmürdü?
Prezident İlham Əliyev Talış kəndindən Azərbaycan xalqına müraciətində çox fundamental bir ifadə işlətdi - “işğal şərikləri”. Azərbaycan torpaqlarının 30 illik işğalı dönəmində Qarabağ və Şərqi Zəngəzurdakı evləri, məscidləri, qəbirləri talan edib daşlarına qədər bazarlarda satmaqla, qüdrətli Azərbaycan Ordusu işğala son qoyarkən isə buna açıq aqressiya göstərməklə İran, bax, həmin 30 illik işğalın şəriki olub”, - deyə deputat vurğulayıb.
Onun sözlərinə görə, təbii ki, İran parlamentinin bu bəyanatının müstəqil, qüdrətli Azərbaycan üçün heç bir önəmi yoxdur, bu, bizim üçün çirkab kağız parçasından başqa bir şey deyil. Amma “bəyanat” adlanan bu çirkaba imza atan o 210 nəfər “ağıllı” başlarını Qumdan çıxarıb nəhayət, başa düşməlidir ki, bu gün İran islam dünyasının arzuolunmaz həlqəsidir və müsəlmanlar adından danışa biləcək sonuncu dövlətdir. Bütün müsəlman aləmi İranı dağıdıcı və bölücü radikal terror dövləti kimi tanıyır. Çünki İranın harada adı, harada emissarı varsa orada ölüm var, işgəncə var, əxlaqsızlıq var, günah var.
“Azərbaycanda beyni yuyulmuş, yaxud Qumda gizli videosu çəkilərək təhdid altında İrana işləməyə məcbur edilən 3-5 yaramazın, xəyanətkarın olması Tehranı cəsarətləndirməsin. Azərbaycan cəmiyyətinin dibində olan narkomanlardan, zirzəmi mollalarından, beynini və şəxsiyyətini Qumda qoyub gəlmiş başıpozuqlardan mədət uman vİrandan fərqli olaraq bizim İranda ürəyi Azərbaycanla döyünən, özü-sözü bir, müzəffər lider İlham Əliyevin bir əmrinə müntəzir olan 35 milyon əsgərimiz var. Biz istəsək sizə dövlətin daxili işinə qarışmaq necə olur göstərərik.
Kimə güvənirsiz siz? Hərbi gücünüzəmi? Hansı hərbi güc, Araz kənarında gölməçədə tank aşıran orduya, yoxsa Qarabağa işğalçılara kömək üçün gəlib qabağımızdan qaçan fərari mollalara?
Bunların ağlı İran daxilində divan tutduqları əliyalın insanlara, asdıqları qadınlara, zəhərlədikləri uşaqlara getməsin, İran anlasın ki, qarşısında qüdrətli Azərbaycan var. İran hər dəfə həddini aşdıqca bu Azərbaycan bir az da böyüyür və daha da bütövləşir”, - deyə Bəhruz Məhərrəmov əlavə edib.
Deputatın sözlərinə görə, İranın bu cür təxribatçı davranışları Azərbaycanda bir həqiqəti də növbəti dəfə aydınlığa çıxardı ki, özünü müxalifət hesab edən antimilli dairələr Azərbaycan əleyhinə hər kəslə əməkdaşlığa hazırdır. Bu gün antimilli Şura, onun sosial mediaya birə darışmış xain ünsürləri açıq formada İran təxribatlarına dəstək verməkədirlər. İrana münasibətdə susmaqla, İranın Azərbaycandakı casuslarını isə müdafiə etməklə, belə bir fon yaratmaq niyyətindədirlər ki, sanki, biz İran casusları yox, dindarları hədəfə almışıq. Amma başa düşmürlər ki, Heydər Əliyev və İlham Əliyev hakimiyyəti illərində ölkədə tikilən məscidlərin sayı sizin üzvlərinizin sayından çoxdur. Ola bilsin, “Kərimə” dövlətini bunlar “Kərimli” dövləti kimi başa düşürlər, amma hər bir halda bilsinlər ki, İrana, Tehran dövlətinin beyni yuyulmuş casuslarına möhtac olmuş bir müxalifət, bu xalq üçün ətrafa üfunət yayan iylənmiş bir cəsəddir.
“Hər kəs anlasın ki, bu dövlət tarixi proseslərin təbii axarında güclənib qalib Azərbaycan olmayıb. Bu dövləti Ulu Öndər Heydər Əliyev qurub, bu dövləti Prezident İlham Əliyev tariximizin ən qüdrətli dövlətinə çevirib.
Heydər Əliyevin Azərbaycançılıq məfkurəsinə sadiq, demokratik, hüquqi, dünyəvi, unitar respublika olan Azərbaycan suveren dövlət kimi özünə tərəfdaş, müttəfiq seçməkdə sərbəstdir və nə İran, nə onun çıxıntıları heç bir formada bu məsələdə, o cümlədən İsrail-Azərbaycan dostluğunda, qardaşlığında söz sahibi deyil və ola da bilməz”, - deyən Bəhruz Məhərrəmov fikirlərini yekunlaşdırıb.
Bölmənin digər xəbərləri
