İsraildə “Xocalıya ədalət” mövzusunda sərgi açılmışdır
Bakı, 14 yanvar (AZƏRTAC). İsrailin şimalında, əslən Azərbaycandan olan israillilər icmasının məskunlaşdığı qədim Akko şəhərindəki bələdiyyə binasında ötən ilin fevralında Təl-Əviv Universitetində start götürmüş “Justice for Khojaly” (“Xocalıya ədalət”) mövzusunda səyyar sənədli fotosərginin açılışı olmuşdur.
“Azİz” Assosiasiyasının mətbuat xidmətindən AZƏRTAC-a verilən məlumata görə, qurumun nəzdindəki Azərbaycan Mədəniyyət Mərkəzinin direktoru Yeganə Salman tədbiri açaraq bildirmişdir ki, 1992-ci ilin fevralında Azərbaycanın Xocalı şəhərində baş vermiş faciəli hadisələri əks etdirən sənədli fotoşəkillər artıq bir ildir həmin gecənin dəhşətləri barədə İsrail vətəndaşlarına əyani məlumat verir. O gecə erməni quldur dəstələri yüzlərlə dinc sakini məhv etmişlər. Onların arasında qocalar, qadınlar, uşaqlar da vardı.
İsraillilər fotoşəkillərin yaxın keçmişdə baş vermiş hadisələri əks etdirdiyinə çətinliklə inanmışlar, çünki bütün bunlar onların yadına Holokostu salmışdır. Dünya erməni işğalçılarının qədim Azərbaycan torpaqlarını zəbt etmək məqsədi ilə apardıqları etnik təmizləmə ilə bağlı bütün həqiqəti bilməlidir. Məhz buna görə də, Azərbaycan-İsrail Beynəlxalq Assosiasiyası (“Azİz”) “Justice for Khojaly” kampaniyası çərçivəsində İsrailin müxtəlif şəhərlərində səyyar fotosənədlər sərgisi müntəzəm keçirir. Bu sənədlər, sözsüz ki, dünyanın nəzərini iyirminci yüzilliyin tarixinə Ermənistan-Azərbaycan, Dağlıq Qarabağ münaqişəsi kimi daxil olmuş hadisələrə yönəldir. Bununla da, “Azİz” Assosiasiyası İsrail xalqını və dünyanın bütün xalqlarını erməni işğalçılarının cinayətlərini mühakimə etməyə və bu cür hadisələrin dünyanın heç bir yerində təkrarlanmasına yol verməməyə çağırır.
Sərginin açılışında Akko şəhərinin meri Şimon Lankri çıxış edərək dəhşətli hadisələrlə bağlı dərin kədərini və hiddətini bildirmişdir. Akko şəhərinin meri demişdir: “Xocalı qətliamına həsr olunmuş bu fotosərgi məni sarsıtdı, gördüklərimdən şoka düşdüm”. Ş.Lankri ümidvar olduğunu bildirmişdir ki, işğal olunmuş Azərbaycan torpaqları tezliklə qaytarılacaq, bütün qaçqınlar öz yurd-yuvalarına dönə biləcəklər. Akkonun meri əslən Azərbaycandan olan israillilərin şəhərin mədəni və ictimai həyatındakı rolundan danışmışdır. Bildirmişdir ki, icmanın inkişaf imkanlarını genişləndirmək məqsədi ilə şəhərdə dağ yəhudiləri icmasının mədəniyyət mərkəzi üçün bina tikiləcəkdir.
Akko şəhəri dağ yəhudiləri icmasının rəhbəri Şirin Nehemiya Mixaeli toplaşanlara ivrit və Azərbaycan dillərində müraciət edərək sərginin təşkilatçılarına minnətdarlığını bildirmişdir. Qeyd olunmuşdur ki, Azərbaycan yəhudiləri yüz illər boyu sülh və firavanlıq şəraitində yaşadıqları Vətənlə bağlı sevgini ən xoş xatirələrini qoruyub saxlamışlar. Ş.Mixaeli Prezident İlham Əliyevin başçılığı ilə Azərbaycanın yürütdüyü sülhsevər siyasətdən danışmış, Azərbaycan xalqına əmin-amanlıq arzulamışdır.
“Azİz” Assosiasiyası idarə heyətinin üzvü, beynəlxalq münasibətlər sahəsində ekspert Arye Qut 1992-ci ilin fevralında Xocalıda baş vermiş faciəli hadisələrdən, Ermənistanın Azərbaycana qarşı işğalçılıq siyasətindən danışmışdır. A.Qut demişdir: “Qanlı qırğın zamanı erməni faşistləri 613 dinc azərbaycanlını məhv etmişlər. Qətlə yetirilənlərin 106-sı qadın, 63-ü uşaq, 70-i qoca olmuşdur. 487 nəfər, o cümlədən 76 uşaq ağır yaralanmış, 56 nəfər “hədsiz dərəcədə amansız” hesab olunan metodlarla öldürülmüşdür. Mülki şəxslər yaxın məsafədən güllələnmiş, başlarının dərisi soyulmuş, diri-diri yandırılmışlar. Birinin gözləri çıxarılmış, digərlərinin başı kəsilmişdir. Bizim qanlı Xocalı qırğınını unutmağa haqqımız yoxdur. Xocalı şəhəri Ermənistanın işğal olunmuş Azərbaycan ərazilərində apardığı etnik təmizləmə siyasətinin mərhələlərindən biri idi. Günahsız uşaqlara, qadınlara və qocalara münasibətdə barbar amansızlığının izahı yoxdur. Bu dəhşətli faciə heç vaxt unudulmamalıdır. Şübhə yoxdur ki, bu təkcə hərbi cinayət deyil, həm də etnik təmizləmə olmuşdur. Azərbaycanın dinc əhalisi ilə yalnız azərbaycanlı olduqlarına görə amansız davranmışlar”.
“Azİz” İsrail-Azərbaycan Beynəlxalq Assosiasiyasının baş direktoru Lev Slivak fotosərginin təşkilinə görə Heydər Əliyev Fonduna, Akko şəhər bələdiyyəsinə minnətdarlığını bildirmişdir.
Akko şəhərində “Justice for Khojaly” səyyar fotosərgisinin uğurla keçirilməsində “AMİ” ümumisrail gəncləri ictimai təşkilatının sədri, “Azİz” Assosiasiyası idarə heyətinin üzvü, Akko şəhərində Qafqaz layihələri üzrə layihənin rəhbəri Rauf Ağalarovun və “Şolumi” dağ yəhudiləri mədəniyyət mərkəzinin direktoru, “Azİz” Assosiasiyası direktorlar şurasının üzvü Şaulya Simon Tovun böyük xidməti olmuşdur.
Bölmənin digər xəbərləri
