İstanbulda Türk Ticarət Sərgisi keçiriləcək
İstanbul, 13 avqust, Günel Karatepe, AZƏRTAC
Bu ilin noyabr ayında İstanbulda ilk dəfə Türkdilli Dövlətlərin Ticarət və İnvestisiya Əməkdaşlıq Forumu və Sərgisi (Türk Ticarət Sərgisi) keçiriləcək. Türkiyənin Ticarət Nazirliyinin himayəsində ROK Beynəlxalq Konsaltinq şirkəti tərəfindən noyabrın 7-də açılışı olacaq sərginin məqsədi türkdilli dövlətlərin iş adamlarının iqtisadi əlaqələrini daha da inkişaf etdirmək və gücləndirməkdir.
Bu sözləri AZƏRTAC-a müsahibəsində Türkiyədə fəaliyyət göstərən ROK Beynəlxalq Konsaltinq şirkətinin rəhbəri Aygün Əliyeva bildirib.
Onun sözlərinə görə, sərgidə ölkələrimizin bütün məhsul qrupları və yeni texnologiyaları sərgilənəcək, şirkətlərin strateji tərəfdaşlıq qurması, o cümlədən türkdilli dövlətlərin ortaq brendlərinin yaradılmasına dair görüşlər keçiriləcək.
“Burada, eyni zamanda, investisiya imkanları, iş adamlarının problemləri və digər mühüm sahələr üzrə məruzəçilərin iştirakı ilə keçiriləcək konfranslarda qeyd edilən problemlər və digər aktual məsələlər ətrafında fikir mübadilələri aparılacaq. Dünyanın əhali baxımından ən sıx və ən əsas iki qitəsi olan Avropa və Asiya son iki əsrdə mühüm dəyişikliklərə məruz qalıb. Bu qitələrdə yaşayan ən böyük millətlərdən biri isə türklərdir. Tarixi və geosiyasi reallıqların tələb etdiyi əməkdaşlığın əhəmiyyətini hər zaman qoruyub saxlayan, təxminən 178 milyon əhalisi və 1,9 trilyon dollarlıq iqtisadi imkanlara sahib türk dövlətləri zəngin təbii sərvətləri və Orta Dəhliz adlanan strateji ticarət yolu üzərində yerləşməsi baxımından dünyaya olduqca əhəmiyyətli imkanlar təqdim edir. Türk Dövlətləri Təşkilatına üzv ölkələrin Ticarət və Sənaye Palataları Birliyi də ortaq iqtisadi artım, eləcə də ticarət sahəsi üzrə dünyanın faydalanacağı ticarət layihələrilə bu birliyin ortaq güc nöqtələrindən biridir”, - deyə Aygün Əliyeva vurğulayıb.
Birliyin 2022-ci ildə ölkələrimiz arasında əməkdaşlığı daha da gücləndirilməsi məqsədilə yaradıldığını xatırladan A.Əliyeva bildirib ki, Türk Dövlətləri Təşkilatı, Türk Ticarət və Sənaye Palataları Birliyi və ROK-un təşkil edəcəyi ticarət sərgisi Türkiyə Ticarət Nazirliyinin nəzdində, Türkiyə Palatalar və Birjalar Birliyinin icazəsi ilə İstanbul Sərgi Mərkəzində (İFM) keçiriləcək: “Türk Ticarət Sərgisi Azərbaycan, Türkiyə, Qazaxıstan, Qırğızıstan, Özbəkistan, Macarıstan, Türkmənistan və Şimali Kipr Türk Cümhuriyyəti arasında ticarət, sənaye, investisiya, texnologiya və xidmətlərin inkişaf etdirilməsi məqsədi daşıyan dövlət qurumları tərəfindən dəstəklənən platformadır. Bu sərgi şirkətlərə düzgün əməkdaşlıq qurmağa və Türk dövlətləri arasında güclü ticarət körpüləri yaratmağa imkan verəcək. Tədbir həm də qardaş ölkələr olaraq tərəfdaşlıq əsasında birliyimizi və inteqrasiyamızı artıraraq daha parlaq gələcəyə birlikdə addımlamağa töhfə verəcək”.
Bölmənin digər xəbərləri
