İtaliyada Qərbi Nil virusundan ölənlərin sayı 20-yə çatıb
Roma, 12 avqust, AZƏRTAC
Bu ilin əvvəlindən indiyədək İtaliyada Qərbi Nil virusundan 20 nəfər dünyasını dəyişib.
AZƏRTAC xəbər verir ki, ötən gün virusa yoluxan daha bir nəfər həyatını itirib.
Ölkədə ilin əvvəlindən indiyədək 179 nəfər bu virusa yoluxub. Yoluxma halları ən çox paytaxt Romanın da yerləşdiyi Latsio regionunda, eləcə də Kampaniya və Lombardiyada qeydə alınıb.
2024-cü ildə isə İtaliyada Qərbi Nil virusuna 460 nəfər yoluxub, onlardan 20-si ölüb.
Ağcaqanadların yoluxdurduğu virusa tutulanların təxminən 80 faizində heç bir əlamət olmadığı halda, 20 faizində hərarət, halsızlıq, ürəkbulanma, qusma, başağrısı, əzələ ağrısı kimi simptomlar müşahidə edilir.
Qərbi Nil virusuna yoluxma faktlarına daha çox Afrika, Avropa, Yaxın Şərq, Şimali Amerika və Qərbi Asiyada rast gəlinir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
