Kitab sərgisində Azərbaycan-Türkiyə münasibətlərindən danışılmışdır
Bakı, 27 may (AZƏRTAC). Türkiyənin Kocaeli Bələdiyyəsinin ənənəvi olaraq hər il təşkil etdiyi kitab sərgisində bu dəfə Türkiyə-Azərbaycan münasibətlərindən danışılmışdır.
Diasporla iş üzrə Dövlət Komitəsindən AZƏRTAC-a bildirmişlər ki, ölkənin ən böyük kitab sərgisinin açılışında Türkiyə Azərbaycan Dərnəkləri Federasiyasının rəhbəri, jurnalist və yazıçı Bilal Dündar iki ölkənin münasibətləri və Azərbaycan torpaqlarının 20 faizinin işğal altında olması barədə auditoriyaya məlumat vermişdir. Bilal Dündar qeyd etmişdir ki, işğal olunmuş Azərbaycan torpaqlarını geri qaytarmaq hər iki millətin qürur məsələsidir.
Qondarma “erməni soyqırımı” məsələsinin 1963-1964-cü illərdə gündəmə gəlməsinə diqqəti cəlb edən Bilal Dündar bildirmişdir ki, 1915-ci ildə fransızlar tərəfindən silahlandırılaraq uniforma verilən, Şərqdə isə “böyük Ermənistan” xəyalları ilə çar Rusiyası tərəfindən silahlandırılan ermənilər kəndlərə hücum edərək təkcə Qars, Ağrı və Ərzurumda 110 min insanı qətlə yetirmişlər.
Bilal Dündarın sözlərinə görə, 1915-ci ildə müharibə, coğrafi şərtlər, epidemiya və xəstəliklər köçürülmələri zəruri etmişdir. O, sözünə davam edərək demişdir: “Amma tarixdə erməni soyqırımı olmamışdır. Soyqırımı bir gecədə 613 insanın qətlə yetirildiyi Xocalıda həyata keçirilmişdir. Erməni tərəfdarları yüz il əvvəl baş verənləri daim gündəmdə saxladıqları halda, Azərbaycanda soyqırımı törədənlərin əllərinin qanı hələ heç qurumamışdır”.
Bölmənin digər xəbərləri
