Konfransda Azərbaycan turizm sektorunun inkişafı istiqamətində müzakirələr aparılmışdır
Bakı, 4 aprel (AZƏRTAC). Aprelin 4-də Bakı Ekspo Mərkəzində XIII Azərbaycan Beynəlxalq turizm və səyahətlər sərgisi (“AITF-2014”) çərçivəsində “Azərbaycan turizm sektorunun inkişafı: imkanlar-problemlər-perspektivlər” mövzusunda konfrans keçirilmişdir.
AZƏRTAC xəbər verir ki, “Ecolife” jurnalının təşkilatçılığı ilə reallaşan konfransda Mədəniyyət və Turizm Nazirliyinin daxili turizmin inkişafı sektorunun müdiri Mahir Qəhrəmanov, Azərbaycan Turizm İnstitutunun tədris işləri üzrə prorektoru Eldar Aslanov, “Millennium tour” şirkətinin prezidenti Ruslan Quliyev, “Ecolife” jurnalının yayım və idarə məsləhətçisi Ali Bülent Kutvan dünyada turizm sektorunun yeri, əhatə etdiyi sahələr, o cümlədən Azərbaycan turizminin mövcud vəziyyəti və inkişafı istiqamətində aparılan işlərdən söhbət açmışlar.
Tədbirdə turizm sektorunun iqtisadi cəhətdən əhəmiyyətli bir sahə olduğu diqqətə çatdırılaraq turizmin iqtisadiyyatın bütün sahələrinə töhfə verdiyi bildirilmişdir. Həmçinin qeyd edilmişdir ki, turizmin mədəni və sosial əlaqə yaratmaq potensialı dünyada insanların bir-birini daha yaxından tanımasında yardımçı olur.
Bildirilmişdir ki, Azərbaycanda baş verən dinamik inkişaf ölkəmizin turizm məkanına çevrilməsinə geniş imkan yaratmışdır.
Konfransda ölkəmizin son beş ildə turizm sahəsində inkişafı, respublikamıza turist axını, bundan əldə olunan gəlirlər, son vaxtlar ölkəmizdə bu sahədə yaradılan şərait barədə məlumat verilmişdir.
Regionların sosial-iqtisadi inkişafı ilə bağlı dövlət proqramlarının qəbul edildiyi diqqətə çatdırılaraq bildirilmişdir ki, bu proqramlarda Azərbaycanın dünya turizm bazarına çıxa biləcək bir səviyyədə xidmət sahələrinin olması öz əksini tapmışdır. Azərbaycanın regionlarında dünya turizm bazarına çıxa biləcək əlverişli turizm obyektləri yaradılmışdır.
Əvvəlki illərə nisbətən ölkəyə turizm axını və turizm şirkətlərinin, mehmanxanaların sayının dəfələrlə artdığı vurğulanaraq bildirilmişdir ki, Azərbaycanda həyata keçirilən irihəcmli layihələr, 2011-ci ilin ölkədə “Turizm ili” elan edilməsi bu sahənin inkişafına və turist axınına öz töhfəsini vermişdir.
Konfransda, həmçinin turizm sahəsindəki hüquqi baza haqqında məlumat verilmiş, mövcud qanunvericilik aktının təkmilləşdirilməsi, müasir tələblərə cavab verən qanunun hazırlanması istiqamətində işlərin aparıldığı qeyd edilmişdir.
Turizm sahəsində əsas məsələlərdən birinin keyfiyyətli xidmət olduğu vurğulanaraq bildirilmişdir ki, bunun üçün peşəkar, savadlı kadrlara ehtiyac vardır. Diqqətə çatdırılmışdır ki, Azərbaycan Turizm İnstitutu kadr hazırlığı istiqamətində əsas təhsil ocağıdır. Burada turizm sektoru üçün bir çox sahələr üzrə kadrlar hazırlanır.
Ölkədə turizmin özəl sektoru dinamik inkişafda olduğu diqqətə çatdırılaraq qeyd olunmuşdur ki, ölkəmizdə bu sahənin mövsümi xarakterli deyil, ilboyu fəaliyyət göstərməsi istiqamətində işlər aparılır.
Tədbirdə ölkəmizin turizm imkanlarının tanıdılması istiqamətində görülən işlərdən, beynəlxalq sərgilərdə iştirakdan da söhbət açılmışdır. Qeyd edilmişdir ki, ölkədə turizmin inkişafı üçün rəqabət qabiliyyəti artırılmalı, yerli sahibkarlar bu işdə maraqlı olmalı, peşəkar kadrlar hazırlanmalı, turizmlə bağlı bəlli bir inkişaf strategiyası müəyyənləşdirilməli, alternativ turizm növlərinin inkişaf etdirilməsi istiqamətində işlər aparılmalıdır.
Bildirilmişdir ki, turizm sahəsində mövcud olan problemlərin aradan qaldırılması üçün onun həlli mexanizmini dəqiq müəyyənləşdirmək lazımdır.
Sonda tədbir iştirakçılarının sualları cavablandırılmışdır.
Bölmənin digər xəbərləri
