Küveyt Dövlət Universitetində açılan sərgidə Azərbaycan stendi qurulub
Bakı, 12 iyul, AZƏRTAC
Küveyt Dövlət Universitetinin Sabah Əl-Salim korpusunda 2022-2023-cü tədris ilində bu ali təhsil ocağının Dil Tədris Mərkəzində ərəb dili üzrə təhsil alan tələbələrin məzun olması ilə əlaqədar “Beynəlxalq Gün” təşkil edilib. Tədbirdə Küveyt Dövlət Universitetində təhsil alan tələbələr, bu ölkədə akkreditə olunmuş diplomatik nümayəndəliklərin təmsilçiləri (Türkiyə, Nigeriya, Tacikistan, Çin, Çad) iştirak ediblər.
Ölkəmizin Küveytdəki səfirliyindən AZƏRTAC-a bildiriblər ki, tədbir çərçivəsində ölkələrin tarixi, mədəni irsi, musiqisi, milli mətbəxi və turizm potensialını əks etdirən geniş sərgi təşkil olunub. Azərbaycan Respublikasının Küveyt Dövlətindəki səfirliyinin dəstəyi ilə sərgidə Azərbaycan stendi qurulub. Tədbir iştirakçılarına ölkəmizin tarixi, mədəniyyəti, mətbəxi, milli geyimləri, xalçaçılıq sənəti, turizm potensialı barədə ətraflı məlumat verilib, həmçinin çap materialları nümayiş etdirilib və paylanılıb.
Sərgi iştirakçılarına məlumat verilib ki, bu il Azərbaycanda və xarici ölkələrdə Azərbaycan xalqının Ümummilli Lideri Heydər Əliyevin və görkəmli oftalmoloq-alim, akademik Zərifə Əliyevanın 100 illik yubileyləri qeyd edilir. Səfirlik tərəfindən ərəb dilində hazırlanmış “Heydər Əliyev-100” kitabı və “Zərifə Əliyeva...azərbaycanlıların həyatını işıqlandıran oftalmoloq” broşürü iştirakçılara təqdim edilib.
Sərgi çərçivəsində Azərbaycanın mədəniyyət paytaxtı Şuşa şəhərinin 2023-cü ildə “Türk dünyasının mədəniyyət paytaxtı” elan edilməsi ilə əlaqədar ölkəmizin və Qafqazın bu qədim şəhərinin tarixi, coğrafiyası və mədəniyyəti barədə məlumat verilib. Eyni zamanda, səfirliyin dəstəyi ilə ərəb dilində nəşr olunmuş “Şuşa: Azərbaycan mədəniyyətinin paytaxtı, Qarabağın incisi” adlı kitab, Şuşa şəhəri ilə bağlı “İrs” jurnalının xüsusi buraxılışı, sərginin təşkilatçılarına və iştirakçılara bu şəhərdə təşkil olunmuş “Xarı Bülbül” festivalına həsr olunmuş tədbirlərə aid digər təbliğat materialları təqdim olunub. Onlara, həmçinin üzərində Yuxarı Gövhər Ağa məscidinin təsviri əks olunmuş kiçik xalçalar hədiyyə edilib.
Bununla yanaşı, sərgidə ölkəmizin tarixi və müasir mədəniyyət abidələrini, gəzməli və görməli yerlərini, tarixi məkanlarını və milli-mənəvi dəyərlərini əks etdirən broşürlər, habelə milli geyim və mətbəx nümunələrimiz nümayiş olunub və ziyarətçilər Azərbaycan mətbəxinə aid şirniyyatlara qonaq edilib.
“Made in Azerbaijan” məhsullarının Küveytdə təbliği məqsədilə ölkəmizdə istehsal olunan “Azərsun Holdinq”in “Bizim Tarla” və “Azərçay” brendlərinin məhsulları da sərgi iştirakçılarına hədiyyə edilib.
Sərgini universitetin müəllim-tələbə heyəti ilə yanaşı, Küveyt ictimaiyyətinin nümayəndələri də ziyarət ediblər.
Bölmənin digər xəbərləri
