Bakı, 4 aprel, AZƏRTAC

Laçın rayonu strateji əhəmiyyətə malik bir rayondur. 1992-ci il may ayının 18-də Laçın rayonu xəyanət nəticəsində bədnam qonşularımız tərəfindən işğal edildikdən sonra bir-birinin ardınca digər rayonlar işğala məruz qaldı və köçkün karvanlarının sayı çoxaldı. Çünki Ermənistandan Qarabağa gedən yol məhz Laçın rayonundan keçirdi. İşğaldan sonra Laçın rayonunun əhalisi ölkənin müxtəlif rayonlarında məskunlaşdı. İşğala qədər 1 şəhər, 1 qəsəbə, 125 kəndi olan Laçın rayonunun əhalisi məcburi köçkün kimi ölkəmizin 58 şəhər və rayonlarında məskunlaşdı. Öz dədə-baba yurdlarından ayrı düşmələrinə baxmayaraq adət-ənənələrini qoruyub saxladılar. Laçın igidlər məskənidir. Həm Birinci, həm də İkinci Qarabağ müharibəsində Laçının mərd oğulları öz igidlikləri ilə seçildilər, 285 nəfəri şəhid oldu. Müharibədə şücaət göstərmiş laçınlılardan 5 nəfəri Azərbaycan Milli Qəhrəmanı adına layiq görüldü. Biz Laçını həm döyüş meydanında, həm də siyasi yolla qaytardıq.

Bunu AZƏRTAC-a açıqlamasında siyasi ekspert Nicat İsmayılov söyləyib.

Onun sözlərinə görə, İkinci Qarabağ müharibəsi dövründə Laçın rayonunun işğaldan azad edilməsi əsas vəzifələrdən biri idi. Məhz Laçın rayonunun cənub hissəsi döyüşdə azad edildi. Artıq Laçın rayonunun Ermənistanın işğalından azad edilməsindən 3 il ötür . Qırx dörd günlük Vətən müharibəsində Ali Baş Komandan İlham Əliyevin rəhbərliyi ilə Azərbaycan Ordusu Ermənistan üzərində şanlı Qələbə qazanaraq torpaqlarımızın 30 ilə yaxın davam edən işğalına son qoydu. Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyanın imzaladığı 10 noyabr tarixli Bəyanata əsasən, Laçın rayonu 2020-ci il dekabrın 1-də Azərbaycana geri qaytarıldı. Buna qədər Ordumuz böyük qəhrəmanlıq nümayiş etdirərək Laçın rayonunun bir neçə kəndini işğaldan azad etmişdi. Silahlı Qüvvələrin Ali Baş Komandanı İlham Əliyev Laçın rayonuna səfəri zamanı Güləbird kəndində Azərbaycan bayrağını qaldırdı. Bu gün işğaldan azad olunmuş digər ərazilərimiz kimi Laçın rayonunda da böyük quruculuq, abadlıq işləri həyata keçirilir.

Laçında inşa olunan və 2025-ci ildə istifadəyə verilməsi planlaşdırılan hava limanının bölgənin beynəlxalq statusunu da artıracağını vurğulayan ekspert əlavə edib: “İşğaldan azad edilmiş rayonlarımızda yol infrastrukturunun da tikintisi diqqətdə saxlanılır. Prezident İlham Əliyevin Sərəncamına əsasən, tikilən Kəlbəcər-Laçın avtomobil yolunun uzunluğu 72.8 kilometrdir. Bu gün Laçına yeni həyat qayıdır. İllərlə yurd həsrəti çəkən sakinlərin qayıdışı ilə Laçın daha da gözəlləşib canlanacaq. Eyni zamanda, Laçın şəhərində Heydər Əliyev Fondunun xətti ilə məscid inşa ediləcək. 2023-cü il martın 28-də Prezident İlham Əliyevin Sərəncamı ilə Məsim Məmmədov Şərqi Zəngəzur iqtisadi rayonuna daxil olan Laçın rayonunda Prezidentin xüsusi nümayəndəsi təyin olundu. Dövlətimizin başçısı Laçın rayonunda Prezidentin xüsusi nümayəndəsi vəzifəsinə təyinatı münasibətilə Məsim Məmmədovu qəbul edərkən deyib: “Sizə böyük etimad göstərilir. Əminəm ki, siz bu etimadı doğruldacaqsınız. Laçın rayonu ölkəmizin ən böyük rayonlarından biridir. Rayonun çox böyük potensialı var. Əlbəttə ki, Laçın rayonuna qayıdacaq keçmiş məcburi köçkünlər bundan sonra Laçında rahat yaşamalıdırlar və Azərbaycan dövləti bunu təmin edəcək”.

Laçın rayonunun AXC-Müsavat cütlüyünün xəyanəti nəticəsində ermənilər tərəfindən işğal edildiyini və 30 ilə yaxın müddətdə talan olunduğunu diqqətə çatdıran Nicat İsmayılov deyib: “Biz çox da uzaq olmayan keçmişdə yaşanan utancverici tariximizi unutmamalı, hakimiyyət uğrunda çəkişmələri və xəyanət nəticəsində torpaqlarımızın erməni işğalçılarına təhvil verilməsini yaddan çıxarmamalıyıq. Həmin dövrün insanları yaxşı xatırlayır, indiki gənc nəsil də bilsin ki, Laçın işğal ediləndən sonra erməni cəmiyyəti AXC-Müsavat qüvvələrinə, şəxsən Elçibəyə təriflər yağdırır, onların fəaliyyətini təqdir edirdi. Bu, həqiqətən də əsl rəzalət idi. Laçının yağmalanması, əhalisinin qətl edilməsi, onminlərlə sakinin məcburi köçkün düşməsi böyük faciə idi və 30 ilə yaxın müddətdə laçınlıların qəlbində dözülməz iztirablar yaşatdı”.