LAKİN BİR DƏFƏ “SƏN YAZ” DEDİ...
AZƏRTAC xəbər verir ki, aprelin 30-da C.Cabbarlı adına Respublika gənclər kitabxanasında Milli Məclisin deputatı, əməkdar jurnalist, yazıçı-publisist Elmira Axundovanın “Heydər Əliyev. Şəxsiyyət və zaman” roman-tədqiqatının təqdimatı olmuşdur. Kitaba ön sözü görkəmli qazax şairi və ictimai xadim Oljas Süleymenov yazmışdır.
Mədəniyyət və turizm naziri Əbülfəs Qarayev tədbiri açaraq bildirdi ki, təqdim edilən ikicildlik bir çox baxımdan dəyərlidir. Böyük faktoloji və politoloji materialın toplandığı kitabda ümummilli lider Heydər Əliyevin həyat və fəaliyyətindən az məlum olan faktlar və epizodlar, müəllifin şərhləri ilə müşayiət olunan eksklüziv informasiya yer almışdır.
Bu kitab həm də ona görə qiymətlidir ki, gələcək nəsillərə, eləcə də Heydər Əliyev siyasi irsini tədqiq edən alimlərə ünvanlanmışdır. Müəllifin sözlərinə görə, o, kitabı yazarkən məlum çətinliklərlə üzləşmişdir. Çünki Heydər Əliyevin adı ilə bağlı olan işlərin hər biri zərrəsinə qədər qiymətlidir. Ümummilli lider sovet hakimiyyəti illərində respublikaya başçılığı dövründə ölkəmizin nüfuzunu qaldırmış, 1993-cü ildə viran edilmiş Vətənə qayıdaraq, ölkəni, əslində, yenidən dirçəltmişdir. Onun fenomenal rəhbərliyinin digər göstəricisi bu idi ki, istər siyasət, istər iqtisadiyyat, istərsə də mədəniyyət olsun, elə bir sahə yox idi ki, ulu öndər həmin sahəyə xüsusi diqqət yetirməsin.
Elmira Axundova bildirdi ki, kitabda Heydər Əliyevin obrazı ilə yanaşı keçmiş SSRİ-nin və Azərbaycanın tanınmış xadimlərinin portretləri də yaradılmışdır. Əsərin məzmunu oxucunu respublika hüdudlarından kənara çıxarır, qonşu Ermənistandakı və Gürcüstandakı vəziyyəti göstərir. E.Axundova dedi: “Mən işimlə bağlı tez-tez Heydər Əliyevin yanında olurdum və özü haqqında, həyat yolu haqqında yazmağı dəfələrlə ona təklif etmişdim. O isə hər dəfə bu məsələni təxirə salırdı. Lakin bir dəfə “sən yaz” dedi. Bu kitablar - Kremldə baş verənlər haqqında düşüncələrdir. Mən Heydər Əliyevin SSRİ rəhbərliyi, o cümlədən Brejnev, Andropov, Suslov, Ustinov, Qorbaçov və başqaları ilə qarşılıqlı münasibətlərinin tarixçəsini açmağa çalışmışam. Kitabda Heydər Əliyevin müasirlərinin, həyatının müxtəlif mərhələlərində bir yerdə çalışdığı insanların canlı səsləri eşidilir”.
Qeyd edək ki, ulu öndərin bütün müsahibələri və onun haqqında xatirələr “Heydər Əliyev və onun ətrafı” adlı növbəti ikicildliyə daxil ediləcəkdir. Müəllif ümummilli liderin həyat və fəaliyyətinin bir növ ensiklopediyası olacaq altı cild nəşr etdirmək niyyətindədir.
Təqdimat mərasimində xalq yazıçısı Anar, Milli Məclisin deputatları Fəttah Heydərov, Asim Mollazadə və başqaları çıxış etdilər. Sonda E.Axundovanın şəxsi arxivindən fotomateriallar nümayiş etdirildi.
######
Bölmənin digər xəbərləri
