Macarıstan Formula 1 Qran-Prisinə ciddi hazırlaşır
Budapeşt, 13 may, AZƏRTAC
Macarıstanda keçiriləcək 40-cı “Lenovo” Formula 1 Qran-Prisinin tam anşlaqla keçəcəyi gözlənilir. Bu səbəbdən əsas bina və tribuna demək olar ki, dörd onillikdən sonra tamamilə yenilənəcək, daha çox insanın yarışı ən yaxşı şəraitdə izləməsinə şərait yaradılacaq.
AZƏRTAC xəbər verir ki, bunu “Hungaroring Sport Plc” şirkətinin prezidenti və baş icraçı direktoru Jolt Dülay deyib. O əlavə edib: “Hunqarorinqin bütün şöhrəti ilə parlaması üçün hər gün mindən çox insan çalışır. Əsas binaya gəlincə, fevralın sonunda konstruksiya işləri başa çatdırılıb. Birinci mərtəbədə işlər müxtəlif tamamlanma mərhələsindədir - qaraj qapıları çəkilib, mexaniki və elektrik işləri aparılır, bölücü şəbəkələr quraşdırılıb”.
Onun sözlərinə görə, yeni əsas damörtüyü artıq tikilib. Tribunanın prefabrik konstruksiyası tam hazırdır, pilləkən elementləri demək olar ki, hamısı yerindədir, təkcə stulların quraşdırılması qalır. Binanın xarici görünüşü 2025-ci il Macarıstan Qran-Prisi üçün tam hazır görünəcək, lakin hələlik yalnız qarajlar və birinci mərtəbə təyinatı üzrə istifadə olunacaq, media mərkəzi və yarışa nəzarət müvəqqəti ərazidə yerləşdiriləcək. Tras 2026-cı ildə Macarıstan Qran-Prisinə qədər tam şəkildə tamamlanacaq ki, bu da onu gələn ildən ölkənin ən böyük idman qurğusuna və böyük tədbirlərin keçiriləcəyi məkana çevirəcək.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
