Malayziyada dünya turizm konfransı keçiriləcəkdir
Bakı, 2 sentyabr (AZƏRTAC). Oktyabrın 21-dən 23-dək Malayziyanın Melaka ştatının inzibati mərkəzi Melaka şəhərində dünya turizm konfransı keçiriləcəkdir.
AZƏRTAC Dünya Turizm Təşkilatının rəsmi saytına istinadla xəbər verir ki, konfransda turizm sənayesinin cari və aktual məsələləri müzakirə ediləcəkdir.
Konfransın ilkin proqramına əsasən açılış mərasimində Malayziyanın mədəniyyət və turizm naziri Mohamed Nazri Bin Azizin, Melaka ştatı hökumətinin rəhbəri İdris Haronun, Dünya Turizm Təşkilatının baş katibi Taleb Rifainin, Malayziya Baş nazirinin müavini Muhyiddin bin Yassinin çıxışları nəzərdə tutulmuşdur.
Konfransın sessiyalarında kütləvi turizmin iqtisadiyyatın digər sektorları ilə əlaqələri, innovativ marketinq, turizm sənayesi məhsulunun inkişafı məsələləri müzakirə ediləcəkdir.
Konfransda Kosta-Rikadan, Butan Krallığından, Avstraliyadan, Çin Xalq Respublikasından və başqa dövlətlərdən nümayəndələr iştirak edəcəklər.
Bölmənin digər xəbərləri
