MƏŞVƏRƏT ŞURASININ İLK İCLASI KEÇİRİLMİŞDİR

05.08.2006 [22:11]
Çap et
A⁺ A^-

AZƏRTAC xəbər verir ki, İqtisadi İnkişaf Nazirliyi və BMT İnkişaf Proqramının birgə həyata keçirdiyi “Qara qızılın insan qızılına çevrilməsində neft gəlirlərindən potensial istifadə olunması” layihəsi üzrə Məşvərət Şurasının ilk iclası keçirilmişdir.

Məşvərət Şurasında İqtisadi İnkişaf Nazirliyi ilə yanaşı, Maliyyə, Təhsil, Əmək və Əhalinin Sosial Müdafiəsi, Sənaye və Energetika nazirlikləri, Milli Bank, Dövlət Neft Fondu və digər dövlət qurumları, eləcə də, Dünya Bankı təmsil olunurlar.

İclası giriş sözü ilə açan Məşvərət Şurasının həmsədri, iqtisadi inkişaf naziri Heydər Babayev layihənin hazırlanması işlərinin gedişi barədə ətraflı məlumat vermişdir. Nazir Heydər Babayev layihənin Azərbaycan Respublikası Prezidentinin 2004-cü il 27 sentyabr tarixli Fərmanı ilə təsdiq edilmiş “2005-2025-ci illər üçün neft və qaz gəlirlərinin idarə olunması üzrə uzunmüddətli strategiya”nın həyata keçirilməsində əhəmiyyətli olacağını vurğulamışdır. İclasın əsas məqsədinin yoxsulluğun azaldılması, qeyri-neft sektorunun, eləcə də, “insan kapitalının” inkişafı üzrə konkret icra mexanizmlərinin araşdırılması olduğunu qeyd edən Heydər Babayev görüş iştirakçılarını fəal müzakirələrə dəvət etmişdir.

Şuranın həmsədri, BMT İnkişaf Proqramının rezident əlaqələndiricisi Marko Borsotti Azərbaycan Prezidentinin rəhbərliyi ilə uğurla həyata keçirilən neft strategiyasına uyğun olaraq, “Qara qızılın insan qızılına çevrilməsi” konsepsiyasının artıq reallıq olduğunu diqqətə çatdırmışdır.

Marko Borsotti insan kapitalının inkişaf etdirilməsi üzrə layihə çərçivəsində Milli Təhsil-Təqaüd Fondunun yaradılması, İnsan Resurslarının İnkişafı Strategiyasının hazırlanması və digər təklifləri bu istiqamətdə atılan konkret addımların nümunəsi kimi qiymətləndirmişdir.

Sonra layihə üzrə fəaliyyət göstərən beynəlxalq ekspertlər qrupunun rəhbəri Maykl Hopkins və BMT İnkişaf Proqramının nümayəndəsi Devid Eyzenberq Milli Təhsil-Təqaüd Fonduna dair təqdimatlarla çıxış etmişlər.

İclasda təhsil naziri M.Mərdanov, Milli Bankın idarə heyətinin sədri E.Rüstəmov, Dövlət Neft Fondunun icraçı direktoru Ş.Mövsümov, AZPROMO-nun Himayəçilər Şurasının sədri Ç.Əsədullayev, Əmək və Əhalinin Sosial müdafiəsi nazirinin müavini İ.Rəhimov və Dünya Bankının ölkə üzrə meneceri Q.Cedrzijak təqdimatla bağlı fikirlərini bildirmiş, görülən işlərin səmərəli davam etdirilməsini məqsədəuyğun saymışlar.

Milli Təhsil-Təqaüd Fondunun yaradılması ilə bağlı təkliflərin bu ilin noyabr ayınadək ümumiləşdirilərək, hökumətə təqdim olunması nəzərdə tutulur.