SİYASƏT
Moskvada Ümumrusiya Azərbaycan Konqresi regional bölmələri rəhbərlərinin görüşü keçirilmişdir
Moskva, 19 dekabr (AZƏRTAC). Dekabrın 19-da Moskvada Ümumrusiya Azərbaycan Konqresi (ÜAK) regional bölmələri rəhbərlərinin Konqresin rəhbərliyi və Azərbaycanın Rusiyadakı səfirliyinin əməkdaşları ilə görüşü keçirilmişdir.
ÜAK baş katibinin müavini Nemət Nağdəliyev görüşü açaraq, Konqresin 2012-ci ildə Rusiyanın dövlət və hökumət orqanları ilə əlaqələri, azərbaycanlıların cəmiyyətə inteqrasiyası, mədəni irsimizin təbliği sahəsində həyata keçirilən layihələrin əhəmiyyətindən danışmışdır.
N.Nağdəliyev bildirmişdir ki, ÜAK-ın Rusiyanın 72 regionunda bölmələri fəaliyyət göstərir. Bu bölmələr Rusiya regionlarında yaşayan azərbaycanlıların problemlərinin həllində, siyasi dairələrlə, KİV-lər və qeyri-hökumət təşkilatları ilə əlaqələrin qurulmasında, mədəni irsimizin təbliğində mühüm rol oynayırlar. Regionlarda azərbaycanlı gənclərin diaspor təşkilatlarına, yerli idarəçilik orqanlarında fəaliyyətə cəlb olunması istiqamətində işlər daha da gücləndirilməlidir.
ÜAK-ın Moskva regional bölməsinin sədri İlqar Hacıyev çıxışında vurğulamışdır ki, regionlarda fəaliyyət göstərən bölmələrin Konqresin mərkəzi aparatı ilə əlaqələri daha sıx olmalı, azərbaycançılıq ideyalarının təbliği, Ermənistan-Azərbaycan, Dağlıq Qarabağ münaqişəsinin həlli istiqamətində Azərbaycan dövlətinin gördüyü işlər və apardığı siyasət barədə ətraflı məlumat verilməlidir.
Sonra ÜAK-ın regional bölmələrinin rəhbərləri çıxış etmiş, Rusiyanın regionlarında yaşayan azərbaycanlıların problemlərindən, diaspor təşkilatlarını narahat edən məsələlərdən danışmışlar. Tədbirdə ÜAK-ın növbəti il üçün fəaliyyət planı müzakirə olunmuşdur. 2014-cü il Qış Olimpiya Oyunlarının Soçidə keçirilməsi ilə əlaqədar şəhərdə Azərbaycan evinin yaradılması məqsədəuyğun hesab edilmişdir.
Fəridə Abdullayeva
AZƏRTAC-ın xüsusi müxbiri
Moskva