Moskvada Ümumrusiya Azərbaycanlılar Konqresinin geniş iclası olmuşdur
Moskva, 30 may (AZƏRTAC). Moskvada Ümumrusiya Azərbaycanlılar Konqresinin (ÜAK) geniş iclası olmuşdur. Respublika Gününə həsr edilmiş iclasda ÜAK-ın regional bölmələrinin nümayəndələri iştirak etmişdir. Görüşdə həmçinin ÜAK-ın icra aparatının nümayəndələri, Konqresin regional bölmələrinin sədrləri, Heydər Əliyev Fondunun, Azərbaycan Respublikası Diasporla İş üzrə Dövlət Komitəsinin və Rusiyanın Azərbaycanlı Gənclər Birliyinin (RAGB) nümayəndələri iştirak etmişlər.
ÜAK-ın icraçı direktoru İlqar Hacıyev öz çıxışında qeyd etmişdir ki, azərbaycanlılar harada yaşamalarından asılı olmayaraq öz tarixi vətənləri - durmadan inkişaf edən, çiçəklənən, dünya birliyində layiqli yer tutan, beynəlxalq arenada nüfuzu ilbəil artan Azərbaycanla fəxr edirlər. İ.Hacıyev müasir Azərbaycanın təşəkkülündə və inkişafında xalqımızın ümummilli lideri Heydər Əliyevin çox böyük rolunu qeyd etmişdir. O vurğulamışdır ki, bu gün Azərbaycan Prezidenti İlham Əliyev Ümummilli Liderin siyasətini uğurla davam etdirir.
İcraçı direktor Rusiyada yaşayan azərbaycanlıların həyatında və Rusiya-Azərbaycan əlaqələrinin möhkəmlənməsində ÜAK-ın rolu barədə söhbət açaraq vurğulamışdır ki, Rusiya Federasiyasında ÜAK-ın 76 regional bölməsi fəaliyyət göstərir. Bu bölmələr azərbaycanlıların daha sıx birləşməsində, onların gündəlik problemlərinin həllində fəal iştirak edirlər.
“Azerbaydjanskiy konqress” qəzetinin baş redaktoru, ÜAK-ın Rəyasət Heyətinin üzvü Rüstəm Arifcanov demişdir ki, qəzet bu il 10 illik yubileyini qeyd edir. Yubiley tədbirləri çərçivəsində Azərbaycan və Rusiya jurnalistlərinin görüşü təşkil ediləcək, həmin görüşdə Azərbaycan reallıqlarının Rusiya mətbuatında işıqlandırılması məsələləri müzakirə olunacaqdır. R.Arifcanov Moskvada və regionlarda bazar günü məktəbləri yaradılmasında Konqresin rolunu da qeyd etmişdir. Onun fikrincə, Qələbənin 70 illiyi ərəfəsində həll edilməli əsas problem İkinci Dünya müharibəsində həlak olmuş azərbaycanlı döyüşçülərin məzarlarının axtarılıb tapılmasıdır.
Azərbaycan Respublikası Diasporla İş üzrə Dövlət Komitəsinin nümayəndəsi Elçin Soltanov Komitənin sədri Nazim İbrahimovun adından iclas iştirakçılarını təbrik etmişdir.
RAGB idarə heyətinin üzvü Emin Hacıyev tədbir iştirakçılarını Respublika Günü münasibətilə təbrik etmiş və vurğulamışdır ki, Azərbaycanda əsası ümummilli lider Heydər Əliyev tərəfindən qoyulmuş gənclər siyasəti uğurla davam etdirilir. Leyla Əliyevanın rəhbərlik etdiyi Rusiyanın Azərbaycanlı Gənclər Birliyi ölkələrimizin gəncləri arasında dostluğu möhkəmlətmək məqsədilə fəal iş aparır. E.Hacıyev demişdir: “RAGB Ümumrusiya Azərbaycanlılar Konqresi ilə sıx əməkdaşlıq edir. Biz çoxlu birgə tədbirlər keçiririk. Bir fakt bizi çox sevindirir ki, ÜAK ilbəil inkişaf edir, öz sərhədlərini genişləndirir, daha güclü olur”.
Vakmos.org saytının baş redaktoru Nilufər Şıxlı və ÜAK-ın mətbuat katibi Tamara Məmmədova öz çıxışlarında saytın fəaliyyəti barədə söhbət açmış, regional bölmələrin nümayəndələrini bu portalın işində daha fəal iştirak etməyə çağırmışlar.
Tədbirin rəsmi hissəsi başa çatandan sonra ÜAK-ın fəxri medalları, diplomları və fərmanları ilə təltifetmə mərasimi olmuşdur.
ÜAK-ın Moskva vilayət bölməsinin icraçı direktoru Araz Mürsəliyev “ÜAK-ın işində fəal iştiraka görə” medalına layiq görülmüşdür. Qeyd edilmişdir ki, Azərbaycanda prezident seçkiləri dövründə Araz Mürsəliyev Moskva vilayətində İlham Əliyevin namizədliyinin dəstəklənməsi üçün aksiya təşkil etmiş, Rusiyada “Xocalıya ədalət” kampaniyasının təşkil olunmasında iştirak etmişdir. O, Moskva vilayəti hökuməti ilə sıx əməkdaşlıq edir.
ÜAK-ın Tula vilayət bölməsinin sədri Tofiq Musayev və Smolensk vilayət bölməsinin sədri Rasim Rzayev “Fəal ictimai işinə görə” fəxri diplomlarla təltif edilmişlər.
Ələddin Məmmədov, Yaşar Hüseynov, Alı Yusupov, Məmməd Quliyev və Qoşqar Təhməzov “Diasporun həyatında fəal iştiraka görə” fəxri fərmanlarla təltif edilmişlər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
