Müqəddəs Taxt-Tac: Dünyada katoliklərin sayı artır
Vatikan, 21 mart, AZƏRTAC
Dünyanın katolik əhalisinin sayı 1,4 milyard nəfərə çatıb.
AZƏRTAC xəbər verir ki, bu barədə Vatikanın Dövlət Katibliyinin Kilsə Statistikasının Mərkəzi İdarəsinin yaydığı hesabatda deyilir.
Bildirilir ki, 2022-2023-cü illərdə dünyada katoliklərin sayı 1,15 faiz artaraq təxminən 1,39 milyarddan 1 milyard 406 milyona yüksəlib. Artım tendensiyası əvvəlki 2 illik dövrə oxşardır.
Katolik əhali 5 qitədə artıb. Ən yüksək artım 3,31 faizlə Afrikada qeydə alınıb, burada katolikləri sayı 272 milyondan 281 milyona yüksəlib. Afrika dünya katoliklərinin 20 faizinin yaşadığı yerdir və katolik kilsəsinin çox dinamik yayılması ilə xarakterizə olunur.
Amerika qitəsində dünya katoliklərinin 47,8 faizi yaşayır. Katoliklərin 27,4 faizi Cənubi Amerikada, 6,6 faizi Şimali Amerikada, qalan 13,8 faizi isə Mərkəzi Amerikadadır.
Asiya qitəsində katoliklərin sayında 0,6 faiz artım olub və bura katolik dünyasında təxminən 11 faiz təşkil edir. Avropa dünya katolik icmasının 20,4 faizini əhatə etməsinə baxmayaraq, qitədə katoliklərin sayında cəmi 0,2 faiz artım olub. İtaliya, Polşa və İspaniya kimi ölkələrdə katoliklərin sayı əhali sayının 90 faizini ötür. Okeaniya katoliklərinin sayı isə 11 milyondan çoxdur.
Hesabatda qeyd olunur ki, katolik dünyasındakı yepiskopların sayı son iki ildə 1,4 faiz artıb. Bundan başqa, Afrika və Asiyada keşişlərin sayı artdığı halda, Avropa və Okeaniyada azalma müşahidə olunub. Dindarların və ilahiyyat tələbələrinin sayında da azalma qeydə alınıb.
Nihad Budaqov
AZƏRTAC-ın xüsusi müxbiri
Vatikan
Bölmənin digər xəbərləri
