Murmansk şəhər ictimai şurası fəaliyyətə başlamışdır
Bakı, 26 dekabr (AZƏRTAC). Murmansk şəhər ictimai şurasının birinci iclası olmuşdur. Şuraya Zapolyarye paytaxtının ictimai təşkilatlarının nümayəndələri və şəhərin fəxri vətəndaşları daxil edilmişdir.
AZƏRTAC xəbər verir ki, ictimai şuranın tərkibinə həmvətənimiz, Ümumrusiya Azərbaycanlılar Konqresi İctimai Təşkilatının Murmansk vilayət bölməsinin sədri Afil Hüseynov da daxildir.
Murmansk administrasiyasının rəhbəri Andrey Sisoyev qeyd etmişdir ki, şura öz sıralarında 20 minə yaxın üzvü olan 76 ictimai təşkilatı birləşdirir.
Qəhrəman şəhər Murmanskın bələdiyyə başçısı Aleksey Veller demişdir: “Biz əminik ki, ən düzgün format seçmişik. Bu şura təkcə şəhər hakimiyyət orqanlarının və ictimai təşkilatların dialoqu üçün məkan deyil, həm də bizim “ağsaqqalların” - qəhrəman şəhərin fəxri vətəndaşlarının rəyləri nəzərə alınmaqla şəhər üçün ən əhəmiyyətli məsələlərin müzakirə ediləcəyi yerdir.
Murmansk şəhər ictimai şurası iqtisadi və sosial xarakterli ən mühüm məsələlərə dair məsləhətləşməyə və vətəndaşlıq təşəbbüslərini müzakirə etməyə imkan verəcəkdir.
Bölmənin digər xəbərləri
