SİYASƏT
Müslüm Maqomayevin pərəstişkarlarının xahişi ilə Çelyabinskdə onun xatirə gecəsi iki dəfə keçirilmişdir
Bakı, 19 dekabr (AZƏRTAC). “Malaxit” orkestri öz yubiley ilinin sonunda Çelyabinsk sakinlərinə əsl yeni il hədiyyəsi təqdim etmişdir. Dekabrın 15-də bu şəhərdəki Sergey Prokofyev adına zalın səhnəsində Müslüm Maqomayevin xatirəsinə həsr edilmiş konsert olmuşdur. Konsertin afişaları yayılandan cəmi iki gün sonra bütün biletlər satılıb qurtarmışdır. Deməli, konsertin təşkilatçılarını həm orkestrin, həm də bütün xalqın sevimlisi olan böyük müğənni Müslüm Maqomayevin pərəstişkarları ilə görüş gözləyirdi. M.Maqomayevin repertuarından seçmə mahnılar “Malaxit” orkestrinin və onun Sankt-Peterburqdan olan solisti, bir neçə beynəlxalq festivalda Qran-pri qazanmış Sergey Zıkovun ifasında səslənmişdir.
AZƏRTAC xəbər verir ki, Yeni il ərəfəsində premyera “Malaxit” Rus Xalq Orkestrinin (kollektivin rəhbəri Viktor Lebedevdir) və “Ozan” Azərbaycan Mədəniyyət Mərkəzinin (sədri Rafael Quliyevdr) birgə layihəsidir. Konsertin proqramına Müslüm Maqomayevin yaradıcılığının müxtəlif istiqamətləri - sovet və xarici ölkə bəstəkarlarının mahnıları, müğənninin öz əsərləri - “Məhəbbət rapsodiyası”, “Elegiya”, “Göy əbədiyyət”, onun xoşladığı melodiyalar mövzusunda fantaziyalar, habelə “Malaxit” orkestrinin və onun solistlərinin ifasında rus və Azərbaycan musiqisi daxil idi.
Xatirə gecəsi böyük məhəbbət və qayğı ilə hazırlanmışdır. Dəvətnamələrin dizaynından başlamış konsert proqramının tərtib edilməsinə qədər bütün incəliklər nəzərə alınmışdır. Foyedə və səhnədə Müslüm Maqomayevin fotoşəkilləri asılmış, xoş ətirli güllər düzülmüşdü.
Gecədə bütün həyatını böyük sənətə, insanlara xidmət işinə həsr etmiş bu qeyri-adi insan haqqında səmimi sözlər səslənmişdir.
Yeri gəlmişkən, “Ozan” Azərbaycan Mədəniyyət Mərkəzi və “Malaxit” Dövlət Rus Xalq Orkestri arasında əməkdaşlıq 2006-cı ildə, bu istedadlı kollektiv Azərbaycanda Çelyabinsk Vilayəti Mədəniyyəti günlərində iştirak edən vaxt başlanmışdır. Dünya şöhrətli müğənninin babası Müslüm Maqomayevin adını daşıyan Bakı Filarmoniyasında təqdim edilən qala-konsert böyük uğurla keçmişdir. Bu tədbirlərin qazandığı uğur əməkdaşlığın davam etdirilməsinə şərait yaratmışdır, çünki həqiqi sənət və xalq diplomatiyası coğrafi sərhədlər tanımır.
Xatirə gecəsi anşlaqla keçmiş, tamaşaçılar sənətçilərin ifasını sürəkli alqışlarla qarşılamışlar. Həmin konsertə düşə bilməyənlər üçün daha bir konsert təşkil etmək qərarı alınmışdır. Müslüm Maqomayevin istedadının pərəstişkarlarının çoxsaylı xahişləri nəzərə alınaraq 2012-ci il dekabrın 17-də Çelyabinsk Gənc Tamaşaçılar Teatrının səhnəsində daha bir konsert verilmişdir.
Xatırladaq ki, noyabrın 18-də “Ozan” Azərbaycan Mədəniyyət Mərkəzinin regional bölməsinin dəstəyi ilə Miass şəhərində Müslüm Maqomayevin xatirə gecəsi keçirilmişdir.