Niderlandda yetişdirilən yeni gül növünə “Azəri” adı verilmişdir
Bakı, 8 yanvar (AZƏRTAC). Azərbaycanın Holland Dostları Assosiasiyasının (DufoA) təşəbbüsü ilə Niderlandda Azərbaycan xalqının şərəfinə xrizantema gülünün “Azəri” adlı yeni növü yetişdirilmişdir.
Diasporla İş üzrə Dövlət Komitəsindən AZƏRTAC-a bildirilmişdir ki, bununla da Niderlandın tarixində ilk dəfə olaraq güllərin nəinki dahi şəxsiyyətlərin, həmçinin ayrı-ayrı xalqların şərəfinə adlandırılması ilə bağlı sertifikat verilmişdir.
Xatırladaq ki, 2013-cü il mayın 10-da Azərbaycan xalqının ümummilli lideri, dünya şöhrətli siyasi xadim Heydər Əliyevin anadan olmasının 90 illik yubileyi münasibətilə Bakıda keçirilən Gül bayramında Azərbaycanın Holland Dostları Assosiasiyası yetişdirdikləri xrizantemanın (payızgülü) yeni növünə qürurlu, ləyaqətli, cəsarətli olan Azərbaycan xalqının “Azəri” adının verilməsi qərara alınmışdır. Gül bayramında bununla bağlı xüsusi sertifikatın imzalanması mərasimi də olmuşdur. Sənədi Azərbaycan Respublikasının Prezidenti İlham Əliyev, xanımı Mehriban Əliyeva və “DufoA”nın prezidenti Marion van der Veqt imzalamışlar.
Beləliklə, dünyada xalqın adının verildiyi yeganə gül də həyata vəsiqə almışdır. Azərbaycanın Holland Dostları Assosiasiyası gələcəkdə dahi yazıçılarımızın, şairlərimizin və tarixi şəhərlərimizin adı ilə adlandırılacaq güllərin dünyada ən çox ziyarətçisi olan Keukenhof parkında əkilməsini planlaşdırır.
Daha iki gül - “Alstrumeriya” adlı tünd qırmızı gül növü məqsədyönlülük rəmzi kimi hər bir azərbaycanlının yaralı yeri olan Qarabağın, ağ rəngli gül isə hüzn simvolu kimi Şuşa şəhərinin şərəfinə yetişdirilmişdir. Tünd qırmızı gül əsasən qan və atəş təsəvvürünü yaradır. Bu, bir tərəfdən gözəllik və həyat, digər tərəfdən intiqam və müharibəni xarakterizə edir. Ağ rəngli gül isə bir növ digər rəngləri neytrallaşdırır, matəmi və kədəri ifadə edir.
Azərbaycanın Holland Dostları Assosiasiyası yetişdirilən yeni gül növünün ölkəmizin ermənilər tərəfindən işğal edilmiş ərazilərindən biri olan Xocalının şərəfinə “DufoA” adlandırılması təşəbbüsünü də irəli sürmüşdür.
Bölmənin digər xəbərləri
