Ölkəmizi fransızlara yaxından tanıtmaq üçün bütün imkanlardan istifadə edəcəyik
Paris, 25 dekabr (AZƏRTAC). Azərbaycanı fransızlara yaxından tanıtmaq üçün bütün imkanlardan istifadə edəcəyik.
Bu fikri Parisdə fəaliyyətini bərpa edən “Azərbaycan evi”nin sədri Mirvari Fətəliyeva təşkilat barədə AZƏRTAC-a verdiyi müsahibəsində səsləndirmişdir.
-Mirvari xanım, necə oldu ki, vaxtilə Parisdə yaradılmış “Azərbaycan evi”nin fəaliyyətini yenidən bərpa etmək ideyası yarandı?
- Bilirsiniz ki, Avropada ermənilərin daha çox məskunlaşdığı ölkə Fransadır. Fransada yaşayan yarım milyona yaxın erməni onlarla diaspor təşkilat ətrafında sıx birləşərək Azərbaycana və qardaş Türkiyəyə qarşı ərazi iddiaları ilə çıxış edir. Onlar ölkəmiz barədə əsl həqiqəti gizlədərək böhtan və qərəzli fikirlər yaymaqla məşğuldurlar. SSRİ-nin süqutundan sonra Azərbaycan və onun ətrafında baş verən hadisələri olduğu kimi fransız xalqına ətraflı şəkildə çatdırmaq məqsədilə Parisdə “Azərbaycan evi”nin yaradılması zərurəti meydana gəldi. 1992-ci ildə Parisdə yaşayan soydaşlarımızdan Timurçin Hacıbəyli, Ramiz Abutalıbov, Vəfa Mustafayev və Huşəng Azərmərd tərəfindən bu istiqamətdə ilk addım atıldı, Fransada qeydiyyatdan keçən ilk Azərbaycan təşkilatı kimi “Azərbaycan evi” yaradıldı. Əlbəttə, həmin dövrdə Azərbaycanda baş verən siyasi dəyişikliklər təşkilatın fəaliyyətində müəyyən çətinliklər yaratmasına baxmayaraq, onun yaradıcıları Azərbaycanla bağlı bir neçə tədbirin həyata keçirilməsinə müvəffəq oldular.
Təşkilatın fəaliyyəti o qədər də uzun sürmədi. “Azərbaycan evi “nin sədri T.Hacıbəylinin vəfatı və daha sonra sədr müavini R. Abutalıbovun vətənə qayıtması nəticəsində təşkilat fəaliyyətini dayandırmağa məcbur oldu.
Fransada Azərbaycan diasporunun fəaliyyəti tam strukturlaşmadığından, güclü erməni diasporunun ölkəmizə qarşı apardığı böhtan kampaniyalarına ləyaqətli cavab vermək üçün Parisdə “Azərbaycan evi”nin fəaliyyətini bərpa etməyin vacibliyi ortaya çıxdı və yerli diaspor nümayəndələrindən ibarət yeni idarə heyətinin rəhbərliyi ilə “Azərbaycan evi” nə yeni bir nəfəs verildi.
- Strasburqda uzun illər səmərəli fəaliyyət göstərən “Azərbaycan evi” ilə əlaqə qurmaq fikriniz vardırmı? Son vaxtlar Azərbaycanı Fransa kimi ölkədə tanıtmaq istiqamətində atılan addımlar, həyata keçirilən layihələr barədə nə deyə bilərsiniz?
- İstər Strasburqdakı, istərsə də parisdəki “Azərbaycan evi”nin fəaliyyəti eyni məqsədə yönəlmişdir. Hər iki cəmiyyətin əsas məqsədi ölkəmizi fransız xalqına yaxından tanıtmaqdır. Azərbaycanın zəngin tarixi və mədəni irsi, Ermənistan-Azərbaycan, Dağlıq Qarabağ münaqişəsi, Xocalı faciəsi ilə bağlı həqiqətləri nəinki Fransa, habelə dünya ictimaiyyətinə çatdırmaq üçün bütün imkanlarımızdan istifadə edəcəyik.
Bir məsələni xüsusi diqqətə çatdırmaq istəyirəm ki, Azərbaycanın birinci xanımı, UNESCO və İSESCO-nun xoşməramlı səfiri, Heydər Əliyev Fondunun prezidenti, Milli Məclisdə Azərbaycan-Fransa parlamentlərarası işçi qrupunun sədri Mehriban Əliyevanın təşəbbüsü və rəhbərliyi altında Azərbaycanı Fransada tanıtmaq məqsədilə son vaxtlar həyata keçirilən irimiqyaslı layihə bu ölkədə yaşayan azərbaycanlıların böyük rəğbətinə səbəb olmuşdur. Hamımız bundan böyük fərəh hissi keçirir və məğrurluq duyuruq.
- Gələcək planlarınızdan söhbət aça bilərsinizmi?
- Bildiyiniz kimi, Avropanın mədəni beşiyi hesab edilən Fransada Azərbaycan mədəniyyətinə son illərdə böyük maraq yaranmışdır. Buna səbəb uğurlu mədəniyyət proqramlarının - sərgilərin, konsertlərin, müxtəlif mövzuları əhatə edən konfransların və digər tədbirlərin təşkil edilməsidir. Diaspor təşkilatı olaraq bizim əsas rolumuz iki mədəniyyət arasında artıq qurulmuş olan körpü üzərindəki axınının daha da gücləndirilməsinə müəyyən töhfələr verməkdir. Bu çərçivədə Parisdə və digər şəhərlərdə rəsm və fotolardan ibarət sərgilərin, folklor ansambllarının çıxışlarının, zəngin Azərbaycan mətbəxinə dair ustad dərslərinin keçirilməsini nəzərdə tutmuşuq. Yeni ildən etibarən soydaşlarımızın uşaqları üçün “Ana dili” kurslarının açılmasını da planlaşdırmışıq. Bir sözlə, ölkəmizi fransız xalqına yaxından tanıtmaq üçün bütün imkanlardan istifadə edəcəyik.
Son olaraq qeyd etmək istəyirəm ki, təşkilatımızın fəaliyyətinə Xaricdə Yaşayan Azərbaycanlılarla İş üzrə Dövlət Komitəsi və Azərbaycanın fransadakı səfirliyi maddi və mənəvi dəstək göstərirlər. Fürsətdən istifadə edərək Parisdəki “Azərbaycan evi” adından Dünya Azərbaycanlılarının Həmrəylik Günü və Yeni il münasibətilə xalqımızı təbrik edir və bütün dünya azərbaycanlılarını doğma Vətənimiz ətrafında sıx birliyə çağırıram.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
