Otuz ildir ağlayan yaşlı gözlər qazanılan zəfərlə sevinc göz yaşları ilə əvəz edildi
Naxçıvan, 14 oktyabr, AZƏRTAC
Qüdrətli Azərbaycan Ordusunun əldə etdiyi növbəti böyük uğurlar, Füzuli rayonunun Qaradağlı, Xatunbulaq, Qarakollu, Xocavənd rayonunun Bulutan, Məlikcanlı, Kəmərtük, Təkə, Tağaser kəndləri işğaldan azad edilməsi hər kəs kimi məni də çox sevindirdi. Bir daha qətiyyətli Prezidentimiz, Ali Baş Komandan İlham Əliyevlə və möhtəşəm ordumuzla fəxr etdim!
AZƏRTAC-ın Naxçıvan bürosuna müsahibəsində bu sözləri deyən AMEA Naxçıvan Bölməsinin mətbuat xidmətinin mütəxəssisi Türkanə Bəylərli bildirib ki, Aprel döyüşləri, Naxçıvan əməliyyatı-Günnüt zəfəri bu gün əldə etdiyimiz zəfərlərin müjdəçisi idi. Həmin vaxt bütün Azərbaycan xalqı bir daha əmin olmuşdu ki, istənilən vaxt ordumuz ərazi bütövlüyümüzü bərpa etmək qüdrətindədir. Azərbaycanın qeyrətli övladları torpaqlarımızda ikinci erməni dövlətinin yaradılmasına imkan verməyib, verməyəcək də!
O vurğulayıb ki, Azərbaycan Ordusu iyulun 12-də ermənilərin Tovuz istiqamətində hücum cəhdinin qarşısını qətiyyətlə alaraq düşmənə layiqli cavab verdi. Sentyabrın 27-də isə növbəti erməni təxribatının qarşısını almaq üçün ordumuzun əks-hücumu düşməni ağır məğlubiyyətlərə uğratdı. Pərən-pərən düşən erməni ordusu həddini və yerini bildi. 30 il ağlayan yaşlı gözlər sevinc göz yaşları ilə əvəz edildi! Ana Vətənin keşiyində ayıq-sayıq dayanan Vətən övladları ilə qürur duymaqla yanaşı, hər gün qəlbi vətənpərvərlik ruhu ilə döyünən minlərlə gənclərin orduya yazılmaq üçün müraciəti, xalqımızın müzəffər ordumuza dəstəyini gördükcə iftixar hissi keçiririk. Çünki bu gün dövlət-xalq-ordu birliyi həm də torpaqlarımızın ərazi bütövlüyünün təmin olunduğunu görmək, böyük Qələbə sevincini yaşamaq deməkdir! Dövlət başçımızın dediyi kimi: “Bu işğala son qoyulmalıdır və qoyulacaq! Biz haqq yolundayıq. Bizim işimiz haqq işidir. Biz zəfər çalacağıq. Qarabağ bizimdir, Qarabağ Azərbaycandır!”
Türkanə Bəylərli qeyd edib ki, bir millətin milli varlığını sübut edəcək əsas şərtlərdən biri onun qədim tarixidir. Öz tarixlərini hələ də müəyyənləşdirə bilməyən və torpaqlarımıza çirkin bir siyasətlə köçürülən ermənilər əsrlərdir ki, burada hər cür alçaq üsullardan istifadə edərək təxribatlar həyata keçirirlər. Azərbaycan torpaqları hesabına Ermənistan dövləti yaradan, həmin ərazilərdə azərbaycanlılara məxsus bütün izləri yox edən, Azərbaycanın adı ilə bağlı olan bütün yer adlarını dəyişdirən ermənilər saxta tarixlərini qanuniləşdirmək üçün məkrli, bədnam niyyətlərinin həqiqətə çevrilməsi uğrunda zaman-zaman gizli və ya aşkar şəkildə həm insanlara, həm də yer adlarına qarşı soyqırımı törədiblər. Biz görürük ki, ermənilər bütün bunları “unudub”. Onlar “unudublar” ki, oğurladıqları və sahib çıxmağa cəhd göstərdikləri milli-mənəvi dəyərlər bizimdir, dastanlar, nağıllar, oradakı qəhrəmanlar ulu ata-babalarımızdır. Azərbaycanın öyünəsi keçmişini özündə yaşadan, toponimlərinin də hətta bir çoxu qədim Naxçıvan torpağı ilə bağlı olan qeyrət kitabımız “Kitabi-Dədə Qorqud”, eyni zamanda Koroğlu, Nəbi, Babək oylaqları bizimdir. Torpaq isə oğurlanan nə dastana, nə nağıla, nə də musiqiyə bənzəməz. Torpaqdan pay olmaz. Min illərdir ata-babalarımız bu torpaqlar uğrundan canlarından keçiblər. Bu gün də Azərbaycanın mərd oğulları torpaq uğrunda, Vətən uğrunda canlarını əsirgəmirlər.
“Ötən illər ərzində xalqımız Azərbaycanın bütün sahələrdə əldə etdiyi nailiyyətləri gələcək müvəffəqiyyətlərin təminatı kimi görürdü. Elə götürək, blokada şəraitində yaşadığımız Naxçıvanı. Vətənimizin ayrılmaz parçası Naxçıvan bu gün ölkəmizin ən qabaqcıl, ən inkişaf etmiş regionlarından biridir. 30 ildir blokada şəraitində yaşamasına baxmayaraq, Naxçıvanda tikilən binalar, genişləndirilən yollar, salınan körpülər, gülkarlıqlar, artırılan meşə zolaqları qədim yurd yerinin simasını elə dəyişib ki, inanmaq olmur. Bütün bunlar təbii ki, doğma yurda bağlılıq hisslərinin bəhrəsidir. Bütün bunlar saxtakarlıq, hiylə və təxribatları baş tutmayan ermənilərə göz dağıdır. Bu gün Naxçıvanı qoruyan, onun təhlükəsizliyini təmin edən Əlahiddə Ümumqoşun Ordu isə düşmənin kabusuna çevrilib”, - deyən Türkanə Bəylərli vurğulayıb ki, bu gün Ermənistan hər baxımdan Azərbaycandan geri qalır. Son döyüşlər isə göstərdi ki, erməni ordusu artıq döyüş ruhunu da tamamilə itirib. Müftə verilən raketlər, toplar-tüfənglər də onların köməyinə çatmır. Ermənilər öz əsgərlərini döyüş meydanında saxlamaq üçün onların ayaqlarını zəncirə bağlayırlar. Bu, vəhşilikdir. Məsələnin həlli isə çox sadədir: sənə aid olmayan torpaqlardan rədd olub çıxırsan, bununla da yaşamaq haqqı qazanırsan. Ancaq görünən odur ki, siyasi və iqtisadi böhranın hökm sürdüyü Ermənistanda diqqətləri başqa istiqamətə yönəltmək istəyən həmin ölkənin baş naziri Nikol Paşinyan hələ də çirkin siyasi-hərbi oyununu davam etdirir. Bunun sonu isə onun üçün və ölkəsi üçün çox acı məğlubiyyətlə qurtaracaq.
Bölmənin digər xəbərləri
