“Öz məşəlini alovlandır!”
İnformasiya köşkləri 3 mindən çox əcnəbi turistə xidmət göstərmişdir
Bakı, 29 iyun (AZƏRTAC). Bakıda “Eurovision-2012” mahnı müsabiqəsinin keçirildiyi günlərdə Bakı Turizm İnformasiya Mərkəzinin Heydər Əliyev Beynəlxalq Aeroportunda, Bakı Dəmiryol Vağzalında, Bakı Beynəlxalq Avtovağzalında, Bakı Dəniz Vağzalının bərə terminalında fəaliyyət göstərən informasiya köşkləri vasitəsilə 3 min 538 nəfər əcnəbi turistə xidmət göstərilmişdir.
Bu barədə AZƏRTAC-a məlumat verən mərkəzin direktor müavini Bəxtiyar Qılıncovun sözlərinə görə, bu köşklərə müraciət edən xarici turistlərə rus, ingilis və başqa əcnəbi dillərdə ölkəmiz haqqında geniş məlumat verilmiş, eyni zamanda, reklam və digər informasiya xarakterli çap materialları, bələdçi kitabları, xəritələr, CD-lər təqdim edilmişdir. Bu işlərin təşkilində Bakı Turizm İnformasiya Mərkəzinin əməkdaşları və Azərbaycan Turizm İnstitutunun tələbələri fəal iştirak etmişlər. Yaxın günlərdə onların mükafatlandırılması nəzərdə tutulmuşdur.
B.Qılıncov bildirmişdir ki, “Eurovision”dan əvvəl və müsabiqənin davam etdiyi günlərdə təmsil etdiyi mərkəzin Azərbaycanın turizm potensialının təbliğ olunması və ölkəmizdə turizm sahəsində xidmət səviyyəsinin daha da yüksəldilməsi məqsədilə həyata keçirdiyi daha bir layihə “Bakı şəhər turu” (Baku City Tour) olmuşdur. Bu tur zamanı fəaliyyət göstərən avtobuslar vasitəsilə 2 min 371 nəfər əcnəbi turist üçün ekskursiya təşkil edilmişdir. Turistlərə reklam informasiya xarakterli çap materialları, bələdçi kitabları, xəritələr, “Rus-Azərbaycan” və “İngilis-Azərbaycan” danışıq kitabçaları verilmişdir.
“Bakı şəhər turu” layihəsinin bir sıra xırda dəyişikliklər edilməklə, bu ilin sonunadək pulsuz reallaşdırılması nəzərdə tutulmuşdur.
Bölmənin digər xəbərləri
