Özünüməşğulluq proqramı çərçivəsində qazanılan uğur hekayəsi: Dərzi Mübariz Ələkbərov - REPORTAJ VİDEO
Tovuz, 1 mart, Ruslan Novruzoğlu, AZƏRTAC
Məşğulluğun təmin edilməsi və kiçik ailə bizneslərinin qurulması istiqamətində həyata keçirilən dövlət siyasəti bu gün yüzlərlə insanın həyatında real dəyişiklik yaradır. Dövlət Məşğulluq Agentliyi tərəfindən icra olunan özünüməşğulluq proqramı çərçivəsində peşə bacarığı olan və ya yeni peşə öyrənmək istəyən vətəndaşlara zəruri avadanlıqlar təqdim edilir, onların davamlı gəlir əldə etməsinə şərait yaradılır. Bu proqramdan yararlananlardan biri də dərzi Mübariz Ələkbərovdur.
AZƏRTAC-ın bölgə müxbiri xəbər verir ki, Mübariz Ələkbərov uzun illərdir dərziliklə məşğul olur. Lakin maddi imkanların məhdudluğu səbəbindən fəaliyyətini genişləndirmək və daha peşəkar xidmət göstərmək imkanları məhdud idi. Özünüməşğulluq proqramı haqqında məlumat əldə etdikdən sonra o, müraciət edərək seçim mərhələsindən keçib və xüsusi təlimlərə qatılıb.
44 yaşlı Mübariz hərbi xidmətdən qayıtdıqdan sonra dərzi yanında şagird olaraq çalışıb bu peşənin sirlərini öyrənib. Tezliklə özü müstəqil şəkildə fəaliyyətə başlayıb. Deyir getdikcə peşəyə bağlanıb və bu sahədə daha çox iş görmək istəyib. Bunun üçün ona avadanlıq və geniş texniki imkanlar lazım gəlib. 22 ildir dərzilik fəaliyyəti ilə məşğul olan Mübariz ailə biznesini qurub, onu inkişaf etdirmək üçün dəstəyə ehtiyacı olduğunu anlayaraq Dövlət Məşğulluq Agentliyinin özünüməşğulluq proqramından yararlanmaq qərarına gəlir.
Layihə çərçivəsində Mübariz Ələkbərova müasir tikiş maşını, overlok, ütü və digər zəruri avadanlıqlar təqdim olunub. Bu dəstək onun iş keyfiyyətini artırmaqla yanaşı, müştəri sayının artmasına da müsbət təsir göstərib. Artıq o, yalnız sadə tikiş xidmətləri deyil, müxtəlif ölçü və dizaynda geyimlərin hazırlanması ilə də məşğuldur. Sifarişlərin artması ailə büdcəsinə sabit gəlir gətirib. “Tanışlardan biri dedi ki, Dövlət Məşğulluq Agentliyində bir proqram var, çatışmayan avadanlıqlarla təmin edirlər. Mənim də çox avadanlığa ehtiyacım var idi. 2020-ci ildə Məşğulluq Agentliyinə müraciət etdim. Bir il sonra mən kursa yazıldım və 4-5 min manat həcmində 7 cür dərzi avadanlıqları ilə təmin olundum. O vaxtdan fəaliyyətimi genişləndirib işləyirəm. Sonradan öz gəlirimdən də başqa yeni avadanlıqlar aldım.”
Mübariz artıq bir dərzi olaraq gələcək üçün də planlar qurub. Biznesini inkişaf etdirib, genişləndirməyi düşünür. “Yenidən Məşğulluq Agentliyinə müraciət etməyi düşünürəm. Belə bir layihə təşkil ediblər iştirak etmişəm. Çatışmayan avadanlqları yenə əldə etməyi planlaşdırıram.”
Sexində artıq bir işçi də çalışdıran Mübariz deyir ki əldə etdikləri avadanlıqlar sayəsində gəlirləri də artıb. Yeniliklərə maraqlı olan dərzi müasir avadanlıqlarla da maraqlanır, işini günün tələblərinə uyğun qurur. Gələcəkdə sexini bir qədər də genişləndirib mini-fabrik qurmağı, işçilər cəlb etməyi planlaşdırır. “Məndə o potensial var. Sadəcə bunun üçün də əlavə avadanlığa ehtiyac var. Məsələn, gələcəkdə işimi genişləndirsəm baş geyimi tikmək olar ki, bu daha gəlirlidir. Hazırda əsas işim uniforma tikməkdir. Sıfırdan kostyum, şalvar biçib tikirəm. Sifarişlərim də kifayət qədərdir. Qış mövsümündə sifariş az olur. Yazda sifarişlər də çoxalacaq” - deyə, dərzi M.Ələkbərov əlavə edib.
Üç övlad sahibi olan Mübariz peşəsinə bağlı olduğunu deyir. Lazımi avadanlıqlarla da təmin olunduğu üçün məmnundur.
Qeyd edək ki, özünüməşğulluq proqramının əsas məqsədi vətəndaşları aktiv əmək bazarına qazandırmaqdır. Mübariz Ələkbərovun timsalında bu məqsədin uğurla reallaşdığını görmək mümkündür. Mübariz Ələkbərovun hekayəsi göstərir ki, düzgün istiqamətləndirmə və vaxtında göstərilən dövlət dəstəyi insan həyatında dönüş nöqtəsi ola, həmçinin, peşə bacarığı və zəhmət dövlət dəstəyi ilə birləşəndə dayanıqlı gəlir mənbəyinə çevrilə bilər. Özünüməşğulluq proqramı bu dönüşü təmin edən sosial layihələrdən biridir.
Bölmənin digər xəbərləri
