PARİSDƏ ANMA MƏRASİMİ KEÇİRİLMİŞDİR
Azərbaycan dövlətinin dünya birliyində özünə layiqli yer tutmasında xüsusi xidmətləri olmuş Prezident Heydər Əliyevin unudulmaz xatirəsi bir dəqiqəlik sükutla yad edilmişdir. Həyatını xalqının işıqlı gələcəyinə həsr etmiş dahi rəhbərin ömür-gün yoldaşı Zərifə xanıma sonsuz məhəbbətindən bəhs edən və gələcək nəslə örnək olan “Əsl məhəbbət haqqında” sənədli filmi nümayiş etdirilmişdir.
Mərasim iştirakçıları bu böyük şəxsiyyətin ülvi məhəbbətindən, ağır günlərdə belə öz sevgisinə sadiq qalmış uzaqgörən insanın saf duyğularından bəhs edən anlara, mərhum Zərifə xanımla bağlı xatirələrinə dərin kədər içərisində tamaşa etmişlər.
Parisdəki “Azərbaycan evi”nin prezidenti Səid İsmayılov dekabrın 15-də Bakıda dəfn mərasimində iştirak etdiyini vurğulayaraq milyonlarla insanın Prezident Heydər Əliyevi son mənzilə yola salmasını dahi rəhbərə ümumxalq məhəbbəti və ehtiramı kimi qiymətləndirmiş, xarici ölkələrin yüksək nümayəndə heyətlərinin dəfndə iştirak etməsini rəhbərimizin siyasət aləmindəki böyük nüfuzu ilə əlaqələndirmişdir. O xaricdə yaşayan azərbaycanlıların doğma vətən ətrafında sıx birləşməsi naminə dekabrın 31-ni Dünya Azərbaycanlılarının Həmrəylik günü kimi təsis edilməsində Heydər Əliyevin şəxsi təşəbbüs və səyindən söhbət açmış, tarixi şəxsiyyət, dövlət başçısı kimi Azərbaycanı bütün dünyada tanıtmaq sahəsindəki xidmətlərindən danışmışdır. Sorbon Universitetinin doktorantı Turab Qurbanov yenicə müstəqillik qazanmış ölkəmizin ağır günlərində xalqın təkidli tələbi və istəyi ilə yenidən hakimiyyətə qayıtmış Prezident Heydər Əliyevin vəfatı xəbərini vətəndən uzaqda – Parisdə təhsil alan tələbələrimizin hədsiz kədərinə səbəb olduğunu xüsusi vurğulamışdır.
Ümummilli liderimizin gənclərin təhsilinə göstərdiyi qayğıdan söz açılarkən bildirilmişdir ki, hələ sovetlər dövründə SSRİ-nin ən mötəbər ali təhsil ocaqlarına azərbaycanlı gənclərin göndərilməsi Prezident Heydər Əliyevin ölkəmizin və xalqımızın gələcəyi barədə fikirləşən, uzaqgörən siyasətçi olduğunu bir daha sübut edir.
Bölmənin digər xəbərləri
