RƏSMİ XRONİKA
PAYTAXTIN HEYDƏR ƏLİYEV PROSPEKTİ ƏSASLI ŞƏKİLDƏ YENİDƏN QURULMUŞDUR
Paytaxt Bakının əsas magistrallarından birinin - Heydər Əliyev prospektinin əsaslı yenidənqurmadan sonra dekabrın 25-də açılışı olmuşdur.
Azərbaycan Prezidenti İlham Əliyev açılışda iştirak etmişdir.
Əvvəllər yan yollarla birlikdə magistralın eni 32 metr idi. İndi isə prospektin eni 45 metrə çatdırılmış, bəzi yerlərdə isə 55 metrdir. 1500 metr uzunluğunda istinad divarları çəkilmişdir. Hazırda yol 10 hərəkət zolaqlıdır. Prospekt boyu yerləşən binaların hamısında milli memarlıq üslubunda əsaslı yenidənqurma işləri aparılmışdır. Müasir üslubda işıqlandırma həm prospektin görünüşünə yaraşıq verir, həm də hərəkətin tənzimlənməsinə kömək edir.
Prezident İlham Əliyev rəmzi açılışı bildirən lenti kəsdi.
Nəqliyyat naziri ZİYA MƏMMƏDOV dövlətimizin başçısına müraciətlə dedi:
-Cənab Prezident, bu prospekt bizim ümummilli liderimiz, ulu öndərimiz Heydər Əliyevin adını daşıyır. Biz də Sizin tapşırığınıza uyğun olaraq, bu prospektin yenidən qurulmasına həqiqi mənada çox böyük məhəbbətlə yanaşdıq. Düşünürəm ki, sanki bu anda ulu öndərimizin ruhu da bizimlə bərabərdir. Ona görə də bir vətəndaş, bir insan kimi, biz nəqliyyatçılar bu işin icra olunmasına, Sizin tapşırığınızın yüksək səviyyədə yerinə yetirilməsinə çox böyük məhəbbətlə, sevgi ilə yanaşmışıq. Hesab edirəm ki, bu qiyməti Siz verəcəksiniz. Ulu öndərimizin adına layiq bir iş görmək üçün əlimizdən gələni əsirgəməmişik.
Prezident İLHAM ƏLİYEV təşəkkür edərək dedi:
-Bəli, mən bunu görürəm və bu prospektin yenidən qurulması çox böyük bir hadisədir. Ulu öndərin adına layiqdir. Eyni zamanda, bu prospekt şəhərə girişdir. İndi şəhərə aeroportdan bir-birindən gözəl iki yol çəkilibdir. Beton yol, hansı ki, ümumiyyətlə, heç vaxt olmamışdır, ən yüksək dünya standartlarına cavab verir. Bu, ənənəvi yoldur, köhnə yol adlandırdığımız aeroport-Bakı yoludur.
Əlbəttə, Heydər Əliyev prospektinin genişlənməsi, burada abadlıq işlərinin aparılması, gözəl plafonların quraşdırılması, yerüstü, yeraltı keçidlərin, tunellərin, körpülərin salınması - bu, böyük, nəhəng layihədir. Mən çox şadam ki, nəzərdə tutduğumuz bütün planlar istədiyimiz kimi həyatda öz əksini tapıbdır. Həm insanlara rahatlıq, həm də şəhərə gözəllik verəcəkdir. Estetik zövq çox yüksək səviyyədədir və istənilən böyük şəhərə yaraşıq verə biləcək yollardır.
Mən bəlkə dünyada az böyük şəhər sadalaya bilərəm ki, şəhərin mərkəzinə aeroportdan iki yol olsun. Adətən bir yoldan istifadə olunur. İkinci yol ola bilər, köməkçi yol kimi istifadə oluna bilər. Amma bizim ən yüksək səviyyədə, böyük keyfiyyətlə, qısa müddət ərzində salınmış iki magistral yolumuz hazırdır. Əminəm ki, gələcəkdə nəzərdə tutduğumuz bütün planlar keyfiyyətlə və bu sürətlə icra olunacaqdır. Artıq Bakının nəqliyyat infrastrukturunun təkmilləşməsi üçün çox böyük işlər görülübdür və növbəti illərdə hələ çox işlər görülməlidir.
Mən fürsətdən istifadə edib bütün bu işlərdə iştirak etmiş insanlara öz dərin minnətdarlığımı bildirmək istəyirəm. Siz bunları böyük məhəbbətlə, keyfiyyətlə və zövqlə yaratmısınız.
Bütün nəqliyyatçılara yeni ildə yeni uğurlar arzulayıram.
######