Politoloq : İrandan olan 25 din xadimi deputat Fazil Mustafa barəsində ölüm hökmü çıxarıb
Bakı, 4 aprel, AZƏRTAC
Azərbaycan Parlamentinin deputatı Fazil Mustafaya qarşı terror aktı üzrə istintaq hələ davam edir, lakin onun İran xüsusi xidmətləri tərəfindən Azərbaycana təhdidlər barədə dəfələrlə xəbərdarlıq etməsi, eləcə də klerikalların kütləvi şəkildə həbs edilməsi bu terror aktında İran izi olduğunu söyləməyə əsas verir.
AZƏRTAC xəbər verir ki, iranlı politoloq Ural Xatəmi bu fikirləri Haqqın.az nəşrinin müxbiri ilə söhbətində açıqlayıb.
Onun sözlərinə görə, İran bütün dünyada terror fəaliyyətini canfəşanlıqla şəkildə təşkil edir, həyata keçirir və maliyyələşdirir. Bu fakt çoxsaylı təhqiqatlar, dosye, məhkəmə qərarları və başqa sənədlərlə təsdiqlənir.
Politoloq vurğulayıb: “Ayətullahlar rejimi terrorizm siyasətini iki istiqamətdə həyata keçirir - rejimə qarşı çıxış edən iranlı müxalifətçilər barəsində və başqa ölkələrin vətəndaşları və müəssisələri barəsində. Ölkə hüdudlarından kənarda siyasi opponentlərin qətlə yetirilməsi praktikası ötən əsrin 80-ci illərinin sonundan başlanıb və bu günə qədər davam edir”.
Xatəminin sözlərinə görə, siyasi qətllər barədə qərar ən çoxu 20-25 nəfərin daxil olduğu din xadimləri dairəsində qəbul edilir.
Ekspert deyib: “Bu adamlar, əlbəttə, şəriətə istinad etməklə fitva verirlər. Məsələn, britaniyalı yazıçı Salman Rüşdinin qətli barədə fitvanı şəxsən Ayətullah Xomeyni vermişdi. Azərbaycanlı jurnalist Rafiq Tağının öldürülməsi barədə fitvanı isə bir qədər aşağı rütbəli din xadimi - Ayətullah Lənkərani çıxarıb. Qətl haqqında fitva o deməkdir ki, özünü şiə hesab edən hər bir insan, hansı ölkədə yaşamasından asılı olmayaraq, fitvanı yerinə yetirməyə, yəni din xadiminin göstərdiyi adamı öldürməyə borcludur. İş burasındadır ki, fitva İslamın bu cərəyanının bütün tərəfdarları üçün müqəddəs dini vəzifəyə çevrilir. İranın hakimiyyət orqanları ayətullahların iradəsinə fanatikcəsinə tabe olan insanlar - həm iranlılar, həm də başqa millətlərin və xalqların nümayəndələri tərəfindən terror aktının yerinə yetirilməsinə “xeyir-dua verə” bilərlər. Bunun müqabilində şiə din xadimləri terror aktlarının icraçılarını mükafatlandırmağa və onlara sığınacaq verməyə həmişə hazırdırlar”.
Politoloq daha sonra əlavə edib ki, türkiyəli məşhur jurnalist Uğur Mumçunun qətlində də İran xüsusi xidmətlərinin əli olub. Xatəminin fikrincə, Uğur Mumçu Türkiyə ərazisində islamçı terror qruplaşmalarının fəaliyyəti barədə silsilə jurnalist təhqiqatları apardığına görə qətlə yetirilib.
Xatəminin sözlərinə görə, İslam İnqilabi Keşikçiləri Korpusunun, habelə İran Kəşfiyyat və Təhlükəsizlik Nazirliyinin rəhbərliyi ayətullahlardan asılı olmayaraq özləri İran hüdudlarından kənarda terror aktları barədə qərar çıxarmaq və bu aktları həyata keçirmək imkanına malikdir.
Xatırladaq ki, Azərbaycan Milli Məclisinin (parlament) deputatı Fazil Mustafa martın 28-də axşam vaxtı öz evinin qarşısında naməlum şəxslər tərəfindən silahlı hücuma məruz qalıb, ayağından və çiynindən odlu silahla yaralanıb. Daxili İşlər Nazirliyi bu terror aktının həyata keçirilməsində şübhəli bilinən 4 nəfərin saxlanmasını elan edib.
Bölmənin digər xəbərləri
