Politoloq: Türkiyənin hərbi–sənaye kompleksinin indiki səviyyəyə çatmasının təməlində illərin əməli təcrübəsi dayanır
Bakı, 23 aprel, AZƏRTAC
Azərbaycanla Türkiyəni bir-birinə təkcə ideoloji, tarixi köklər deyil, həmçinin regional və qlobal səviyyədə strateji milli maraqlar da bağlayır. Hər iki dövlətin başçıları ölkələrimiz arasında dərinləşən münasibətlərin bünövrəsinin möhkəmləndirilməsi naminə birgə addımlar atıblar. Vətən müharibəsi zamanı başda Prezident Rəcəb Tayyib Ərdoğan olmaqla Türkiyənin siyasi rəhbərliyi Azərbaycana bütün mötəbər beynəlxalq platformalarda siyasi və mənəvi dəstəyini əsirgəmədi. Dövlətimizin başçısı İlham Əliyev Qarabağın düşmən işğalından azad olunmasında Türkiyənin əsl qardaş ölkəyə yaraşan münasibət sərgilədiyini xüsusi olaraq vurğulayıb.
Bu fikirləri AZƏRTAC-a açıqlamasında politoloq Tural Əliyev söyləyib.
O söyləyib ki, məhz Rəcəb Tayyib Ərdoğanın hakimiyyətə gəlişindən sonra Türkiyənin siyasi və iqtisadi həyatında geniş islahatlara start verildi, bütün istiqamətlərdə, xüsusilə də hərbi və müdafiə sənayesi sahələrində böyük irəliləyişlər əldə edildi. Təbii olaraq Türkiyənin iqtisadi imkanlarının genişlənməsi Azərbaycanı da sevindirir və qürurlandırır. Öz növbəsində Türkiyə də Azərbaycanın qazandığı nailiyyətlərlə fərəhlənir. Təsadüfi deyil ki, 2020-ci ildə “Defense News” nəşri dünyanın 100 ən böyük müdafiə sənayesi şirkətləri siyahısına Türkiyənin 7 şirkətini daxil edib. Vətən müharibəsində Türkiyədən alınmış PUA-lar və digər müasir silahlar nəinki düşmənləri sarsıtdı, hətta dost olmayan ölkələr üçün də gözlənilməz oldu. Onilliklərdir dünya silah istehsalında liderlik edən dövlətlər Türkiyənin müasir hərbi-texnoloji kəşflərini maraqla qarşılasalar da, qısqanclıq da nümayiş etdirdilər desək yanılmarıq. Qardaş ölkənin hərbi-sənaye kompleksinin indiki səviyyəyə çatmasında illərin əməli təcrübəsi, eyni zamanda, ölkənin hakim siyasi partiyasının məqsədyönlü fəaliyyəti və hədəflərini dəqiq seçməsi səbəb olub.
"Azərbaycanın Avropa bazarlarına neft-qaz ixracatında Türkiyə çox mühüm rol oynayır. Bakı-Tbilisi-Ceyhan boru kəməri, Cənubi Qaz Dəhlizi kimi irimiqyaslı layihələr vasitəsilə ölkəmizin karbohidrogen ehtiyatları Türkiyə ərazisindən Qərbə nəql olunur. Azərbaycan və Türkiyə Avropanın enerji təhlükəsizliyində strateji tərəfdaşlardır. TAP və TANAP-ın inşa edilməsi Avropanın enerji təchizatının artan şaxələndirilməsində yeni mərhələnin başlanğıcı hesab olunur. Hər iki qardaş ölkə regionda bəzi təhdidləri aradan qaldırmaqla irihəcmli enerji layihələrini həyata keçirməyi bacarıb. Türkiyə-Azərbaycan tandemini qəbul etməyən bəzi qüvvələr mane olmağa çalışsalar da, bu birliyi sarsıda bilmədilər. Artıq Qərbin bəzi dairələri anlayır ki, enerji təhlükəsizliyində yalnız Türkiyə və Azərbaycanın əvəzsiz xidmətləri zəmanət ola bilər. Bu baxımdan “gələcəyin körpüsü” sayılan Orta Dəhlizin mühüm komponenti olan Zəngəzur dəhlizinin açılması ilə Asiya və Avropanı birləşdirən logistik yollar daha əlverişli olacaq. Bu dəhliz regionun inkişafına təkan verəcək, sabitlik məkanına, geosiyasi və geoiqtisadi proseslərin aparıcı qüvvəsinə çevriləcək", - deyə T. Əliyev qeyd edib.
Politoloq vurğulayıb ki, Azərbaycan-Türkiyə qardaşlığını daha da möhkəmləndirən hadisələrdən biri 2021-ci ilin iyun ayında imzalanmış Şuşa Bəyannaməsi oldu. Hər zaman bir-birinə dayaq olan Azərbaycan və Türkiyə hüquqi sənədlərlə bir daha qardaşlığı təsdiq edilər və dünyaya önəmli mesajlar verdilər. Bu mesajlarla isə regionda gedən proseslərin axarını dəyişdilər. “Vaxt keçdikcə görünməyən vacib məqamların reallaşmasının şahidi olacağıq. Əminliklə söyləmək olar ki, iki qardaş dövlət zamanın ağır sınaqlarından üzüağ çıxmaqla yanaşı, bir çox strateji uğurlu layihələrə də müştərək imza atacaqlar”, - deyə politoloq qeyd edib.
Bölmənin digər xəbərləri
